Live Updates

وزیراعلی مریم نواز شریف سے سپیکر پنجاب اسمبلی کی ملاقات ، باہمی دلچسپی کے امور، سیاسی صورتحال اور فلاح عامہ کے منصوبوں پر تبادلہ خیال

پیر 5 مئی 2025 23:10

لاہور (اُردو پوائنٹ اخبارتازہ ترین - اے پی پی۔ 05 مئی2025ء) وزیراعلی پنجاب مریم نوازشریف سے سپیکر پنجاب اسمبلی ملک محمد احمد خان نے ملاقات کی۔ ملاقات میں رکن پنجاب اسمبلی سردار محمد عاصم شیر میکن اورخرم خان ورک بھی موجود تھے۔ اس موقع پر باہمی دلچسپی کے امور، سیاسی صورتحال اور فلاح عامہ کے منصوبوں پر تبادلہ خیال کیا گیا۔ ملاقات میں ملکی و سیاسی امور،بجٹ اور ترقیاتی منصوبوں پر بات چیت کی گئی۔

وزیراعلی مریم نوازشریف نے سپیکرملک محمد احمد خان کو پنجاب اسمبلی امور بطریق احسن سرانجام دینے کو سراہا۔ سپیکر پنجاب اسمبلی نے وزیراعلی مریم نوازشریف کو اپنی چھت، اپنا گھر پروگرام میں ریکارڈ گھر بنانے پر مبارکباد پیش کی اور کہا کہ طلبہ کیلئے وزیراعلی مریم نوازشریف کا ہونہار سکالر شپ اور لیپ ٹاپ پراجیکٹس کو سراہتے ہیں۔

(جاری ہے)

رکن پنجاب اسمبلی سردار محمد عاصم شیر میکن کا وزیراعلی مریم نوازشریف کو محمد نوازشریف انسٹیٹیوٹ آف کارڈیالوجی پراجیکٹ میں دلچسپی کو سراہا۔

رکن پنجاب اسمبلی خرم خان ورک نے وزیراعلی مریم نوازشریف کو صوبے میں ریکارڈ ترقیاتی پراجیکٹس شروع کرنے پر خراج تحسین پیش کیا۔ ارکان اسمبلی نے وزیراعلی مریم نوازشریف کی ترقیاتی منصوبوں میں مشاورت کوقابل تحسین قرار دیا۔ رکن صوبائی اسمبلی عاصم شیر میکن نے کہا کہ سرگودھا میں محمد نوازشریف انسٹیٹیوٹ آف کارڈیالوجی پراجیکٹ اپنی مثال آپ ہے ۔

انہوں نے کہا کہ وزیراعلی مریم نوازشریف نے قائد محمد نوازشریف اور شہبازشریف کی یاد تازہ کر دی ہے۔ وزیراعلی مریم نوازشریف نے ارکان صوبائی اسمبلی سے گفتگو کرتے ہوئے کہا کہ تاریخ گواہ ہے کہ جب بھی مسلم لیگ(ن) کی حکومت آتی ہے تو لوگوں کے مسائل حل ہوتے ہیں، پورے پنجاب میں ترقیاتی کاموں کا جال بچھا دیا گیا ہے۔صحت، تعلیم،انفراسٹرکچر اور ماحولیاتی آلودگی جیسے اہم شعبوں پر حکومت کام کررہی ہے، عوامی خدمت کے سفر کو مزید تیزی سے آگے بڑھائیں گے۔وزیراعلی مریم نوازشریف نے کہا کہ پورے پنجاب میں روٹی کی قیمت دیگر صوبوں کی نسبت کم ہے اور موجودہ حکومت کسانوں کے مسائل کو ترجیحی بنیادوں پر حل کررہی ہے۔