Live Updates

صدر مملکت آصف علی زرداری کی بھارتی جارحیت کی شدید مذمت، پاکستان کا بھرپور جواب دینے کا عزم

پاکستان بھارتی جارحیت کا بھرپور جواب دے گا اور اپنے دفاع کے لیے ہر ممکن اقدام اٹھائے گا، صدر مملکت

بدھ 7 مئی 2025 08:20

اسلام آباد(اُردو پوائنٹ اخبارتازہ ترین - این این آئی۔ 07 مئی2025ء)صدر مملکت آصف علی زرداری نے بھارت کی جانب سے پاکستان کے خلاف جارحیت کی شدید مذمت کرتے ہوئے کہا ہے کہ پاکستان بھارتی اشتعال انگیزی کا بھرپور اور منہ توڑ جواب دے گا۔اپنے ایک بیان میں انہوں نے کہا کہ بھارت نے بلا اشتعال شہری آبادی کو نشانہ بنا کر نہ صرف بین الاقوامی قوانین کی خلاف ورزی کی ہے، بلکہ اقوام متحدہ کے چارٹر اور پاکستان کی خودمختاری کی کھلی توہین کی ہے۔

صدر نے کہا کہ پاکستان کی مسلح افواج اپنے مادر وطن کے ایک ایک انچ کے دفاع کے لیے پوری طرح تیار اور اہل ہیں۔انہوںنے کہاکہ بھارت کے بزدلانہ اقدامات ایک فاشسٹ حکومت کا اصل چہرہ بے نقاب کرتے ہیں، جو اپنے سیاسی ایجنڈے کو آگے بڑھانے کے لیے علاقائی امن و سلامتی کو دا پر لگانے کے لیے تیار ہے۔

(جاری ہے)

صدر مملکت نے اس بات پر زور دیا کہ بھارت کی جانب سے شہری علاقوں کو نشانہ بنانا بین الاقوامی قانون کی کھلی خلاف ورزی ہے، جس کی جتنی بھی مذمت کی جائے کم ہے۔

انہوںنے کہاکہ پاکستان کی خودمختاری اور علاقائی سالمیت کے تحفظ کے لیے ہمارا عزم غیر متزلزل ہے، اور ہم کسی بھی جارحیت کا بھرپور جواب دیں گے۔انہوں نے کہا کہ پوری پاکستانی قوم اپنی بہادر مسلح افواج کے پیچھے متحد ہے اور ملک کی سلامتی کے لیے کسی بھی قربانی سے دریغ نہیں کرے گی۔صدر آصف علی زرداری نے عالمی برادری سے اپیل کی کہ وہ بھارت کی جارحیت کی مذمت کرے اور پاکستان کے خودمختاری کے حق میں آواز اٹھائے۔