بھارتی افواج کو پہنچنے والے بھاری نقصانات مودی سرکار کو ہوش میں لانے کیلئے کافی ہیں، پی ٹی آئی

اسلام آباد ( اُردو پوائنٹ اخبارتازہ ترین۔ 07 مئی 2025ء ) پاکستان تحریک انصاف نے کہا ہے کہ پاک فوج کا منہ توڑ جواب مودی سرکار کو ہوش میں لانے کے لیے کافی ہے۔ بھارت کی جانب سے رات کی تاریکی میں پاکستان پر حملے اور پاک فوج کی جانب سے وطن عزیز کا شان دار دفاع کرتے ہوئے دشمن کو دھول چٹانے پر پاکستان تحریک انصاف کی جانب سے ردعمل سامنے آ گیا، ترجمان پی ٹی آئی کا کہنا ہے کہ پاکستان تحریک انصاف پاکستانی سرزمین کے اندر مختلف مقامات پر بلا اشتعال اور وحشیانہ بھارتی حملوں کی سخت ترین الفاظ میں مذمت کرتی ہے، جس کے نتیجے میں معصوم شہریوں کی شہادت ہوئی، یہ پہلگام میں بھارتی حکام کی جانب سے کیے گئے فالس فلیگ آپریشن کا شاخسانہ ہے، اس وقت سے بھارتی بیانات مسلسل جارحانہ عزائم سے بھرپور ہیں۔

(جاری ہے)

ترجمان تحریک انصاف نے کہا کہ اپنے دعوؤں کو ثابت کرنے کے لیے معتبر معلومات سامنے لانے یا پاکستان کی جانب سے پہلگام واقعے کی غیر جانبدارانہ اور شفاف تحقیقات پر رضامند ہونے کی بجائے بھارت نے پاکستان سے اپنی ناقابل اصلاح دشمنی کی تسکین کے لیے خود ہی یہ راستہ منتخب کرنے کا فیصلہ کیا، بلاشبہ جارحیت کے اس بلا اشتعال عمل کا جواب پاکستان کی مسلح افواج بھرپور طریقے سے دیں گی، بہادر پاک فضائیہ کی جانب سے پہلے ہی بھارتی مسلح افواج کو پہنچنے والے بھاری نقصانات مودی سرکار کو ہوش میں لانے کے لیے کافی ہیں۔

پی ٹی آئی ترجمان کا کہنا ہے کہ یہ امید کی جاتی ہے کہ بھارت اپنے بڑھتے ہوئے جنگی جنون اور تسلط پسندانہ انا کی تسکین کے لیے تنازع کو مزید نہیں بڑھائے گا جو دو جوہری ہتھیاروں سے لیس ریاستوں کے درمیان جنگ دونوں طرف ناقابل بیان تباہی اور خونریزی کا باعث بن سکتی ہے، ایسے مشکل حالات میں ہوش مندی کا مظاہرہ کرنا ضروری ہے کیوں کہ تنازع بحرانوں کا حل نہیں نکالتا، یہ دونوں ریاستوں اور ان کے عوام کے لیے سراسر نقصان کا باعث بن کر ان میں اضافہ ہی کا باعث بنتا ہے۔

اعلامیہ میں یہ بھی کہا گیا ہے کہ اس لمحے میں ہم اپنے بانی چیئرمین عمران خان کی سلامتی اور تحفظ کے لیے بھی اپنی گہری تشویش کا اظہار کرتے ہیں اور حکام سے مطالبہ کرتے ہیں کہ انہیں فوری طور پر رہا کیا جائے، قوم کو قومی بحران کے اس لمحے میں اپنی سچی قیادت سے محروم نہیں کیا جا سکتا، عمران خان کی موجودگی بھارتی جنگی جنون کے خلاف متوقع کثیر الجہتی کارروائی کی حمایت میں عوام کے لیے ایک طاقتور قوت محرکہ ثابت ہوگی، عمران خان پارٹی کی تمام قیادت اور پاکستان کے اندر اور باہر اس کی وسیع حمایت کرنے والے، وطن کی ایک ایک انچ زمین اور اس کے عوام کے دفاع میں بھارت کی بے مہابا جارحیت کے خلاف اپنی مسلح افواج کے ساتھ ثابت قدم ہیں، اللہ تعالیٰ ہمارا رہبر اور محافظ ہو۔