Live Updates

بھارت کا بزدلانہ حملہ،سیکرٹری داخلہ پنجاب نورالامین مینگل کی زیر صدارت سکیورٹی کے حوالے سے ہنگامی اجلاس

بدھ 7 مئی 2025 18:12

لاہور (اُردو پوائنٹ اخبارتازہ ترین - این این آئی۔ 07 مئی2025ء) رات کی تاریکی میں پاکستان پر بھارت کا بزدلانہ حملہ، وزیراعلی پنجاب کی ہدایت پر محکمہ داخلہ پنجاب میں سکیورٹی کے حوالے سے ہنگامی اجلاس ہوا۔ سیکرٹری داخلہ پنجاب نور الامین مینگل نے اجلاس کی صدارت کی جس میں حکومت پاکستان کی جاری کردہ ’’وار بک‘‘کے تناظر میں اہم فیصلے کیے گئے۔

ترجمان محکمہ داخلہ پنجاب کے مطابق صوبہ بھر میں اہم تنصیبات کو محفوظ بنانے کیلئے سکیورٹی اداروں کو متحرک کیا گیا ہے اور پنجاب بھر کے ہسپتالوں میں ہنگامی حالت نافذ کر دی گئی ہے۔ تمام قانون نافذ کرنے والے اداروں اور طبی عملے کو ڈیوٹی پر رپورٹ کرنے کی ہدایت کی گئی ہے۔ محکمہ داخلہ نے شہری دفاع کیلئے سول ڈیفنس کے تمام وسائل کو فیلڈ میں متحرک کر دیا ہے۔

(جاری ہے)

محکمہ داخلہ پنجاب میں انٹرنل سکیورٹی کا مرکزی کنٹرول روم قائم کر دیا گیا ہے جبکہ پنجاب بھر کے ڈپٹی کمشنرز کو اپنے کنٹرول رومز محکمہ داخلہ کے مرکزی کنٹرول روم سے منسلک کرنے کی ہدایت کی گئی ہے۔ صوبہ بھر میں ہنگامی صورتحال کے اعلان کیلئے سائرن اور وارننگ سسٹم ایکٹیویٹ کیے گئے ہیں جبکہ شہری دفاع کیلئے شیلٹرز کے تعین اور انہیں فنکشنل کرنے کی ہدایت کی گئی ہے۔ محکمہ داخلہ پنجاب نے ہدایت کی ہے کہ ہنگامی صورتحال میں ہسپتالوں اور مواصلاتی لائنوں کو مکمل طور پر فعال رکھا جائے۔ ہنگامی صورتحال کے پیشِ نظر پنجاب بھر میں تمام تعلیمی ادارے 7مئی کو بند رہے جبکہ شیڈول تمام امتحانات ملتوی کر دیئے گئے ۔