بھارت نے عبادت گاہوں، نہتے ،معصوم بچوں اور خواتین پر حملہ کر کے بزدلی ،اخلاقی پستی کا ثبوت دیا ‘ جہانگیر ترین

پاکستان اس اشتعال انگیزی کا موثر اور مکمل جواب دینے کا حق محفوظ رکھتا ہے،معروف سماجی شخصیت کا بھارتی جارحیت پر بیان

بدھ 7 مئی 2025 23:46

لاہور(اُردو پوائنٹ اخبارتازہ ترین - این این آئی۔ 07 مئی2025ء)معروف سماجی شخصیت جہانگیر خان ترین نے کہا ہے کہ بزدل دشمن نے رات کی تاریکی میں ہماری عبادت گاہوں، نہتے اور معصوم بچوں اور خواتین پر حملہ کر کے اپنی بزدلی اور اخلاقی پستی کا ثبوت دیا ہے، جو کہ انتہائی قابلِ مذمت اور قابلِ نفرت عمل ہے۔

(جاری ہے)

اپنے بیان میں جہانگیر ترین نے پاک فوج کی پیشہ ورانہ صلاحیتوں کو سراہتے ہوئے کہا کہ پاکستان کی بہادر افواج نے دشمن کے جارحانہ اقدام کا بروقت اور موثر جواب دیتے ہوئے ان کے پانچ جنگی طیارے تباہ کر دئیے، ان شا اللہ بھارت کو اس جارحیت کا منہ توڑ جواب دیا جائے گا۔

انہوںنے کہا کہ پاکستانی قوم ایک غیرت مند اور خوددار قوم ہے اور اپنی سالمیت، خودمختاری اور قومی وقار کی اس جنگ میں قوم کا بچہ بچہ پاک فوج کے شانہ بشانہ کھڑا ہے۔ انہوںنے کہا کہ نہتے شہریوں پر حملہ سنگین جنگی جرائم کے زمرے میں آتا ہے اور بین الاقوامی قوانین کی کھلی خلاف ورزی ہے،عالمی برادری کو اس جارحیت اور خطے کا امن تباہ کرنے کی سازش کا نوٹس لینا چاہیے۔ انہوںنے کہا کہ پاکستان اس اشتعال انگیزی کا موثر اور مکمل جواب دینے کا حق محفوظ رکھتا ہے۔