اقوام متحدہ کی بھارت اور پاکستان سے زیادہ سے زیادہ تحمل کی اپیل

جمعرات 8 مئی 2025 02:10

نیویارک (اُردو پوائنٹ اخبارتازہ ترین - اے پی پی۔ 08 مئی2025ء) اقوام متحدہ نے بھارت کی جانب سے پاکستان اور آزاد کشمیر کے کچھ حصوں پرمیزائل حملوں کے تناظر میں دونوں ممالک سے زیادہ سے زیادہ تحمل کا مظاہرہ کرنے کی اپنی کال کی تجدید کی اور کہا کہ دنیا دونوں ممالک کے درمیان فوجی تصادم کی متحمل نہیں ہو سکتی۔

(جاری ہے)

نیویارک میں اقوام متحدہ کے ہیڈکوارٹر میں نیوز بریفنگ میں سوالات کے جوابات دیتے ہوئے اقوام متحدہ کی ترجمان سٹیفنی ٹرامبلے نے اس بات کا اعادہ کیا کہ دنیا جنوبی ایشیا کے دو ہمسایوں کے درمیان فوجی تصادم کی متحمل نہیں ہو سکتی۔

یہ پوچھے جانے پر کہ کیا ہندوستان اور پاکستان میں اقوام متحدہ کے مبصر گروپ (UNMOGIP) کی خدمات انجام دینے والے اقوام متحدہ کے اہلکار محفوظ ہیں، جو کشمیر میں لائن آف کنٹرول کی نگرانی کرتے ہیں تو انہوں نے کہا کہ ہاں، ہم نے چیک کیا ہے سب محفوظ ہیں۔بزدل بھارت نے رات کی تاریکی میں پاکستان کی شہری آبادیوں کو نشانہ بنایا جس کے نتیجے میں متعددمعصوم جانیں گئیں تاہم پاکستان نے بھرپور جوابی کارروائی کی اور دشمن کی بندوقوں کو خاموش کروا دیا۔