ہم اپنی علاقائی سالمیت اور خود مختاری کا ہر قیمت پرتحفظ یقینی بنائیں گے، وزیراعظم

شہبازشریف کا پاکستان سے یکجہتی کے اظہار اور حمایت پر ترکیہ کے صدر رجب طیب اردوان سے اظہار تشکر

ساجد علی جمعرات 8 مئی 2025 09:50

ہم اپنی علاقائی سالمیت اور خود مختاری کا ہر قیمت پرتحفظ یقینی بنائیں ..

اسلام آباد ( اُردو پوائنٹ اخبارتازہ ترین۔ 08 مئی 2025ء ) وزیراعظم محمد شہبازشریف نے مشکل کی گھڑی میں پاکستان کے ساتھ یکجہتی کے اظہار اور حمایت پر ترک صدر رجب طیب اردوان کا شکریہ ادا کرتےہوئے کہا ہے کہ پاکستان جنوبی ایشیا میں قیام امن اور کشیدگی کم کرنے کے لیے ان کی کوششوں کو سراہتا ہے۔ تفصیلات کے مطابق وزیراعظم محمد شہبازشریف کی ترک صدر رجب طیب اردوان سے فون پر بات چیت ہوئی جس میں انہوں نے مشکل وقت میں پاکستان کے ساتھ یکجہتی کے اظہار اور حمایت پر ترکیہ کا شکریہ ادا کیا، وزیراعظم نے کہا کہ وہ گزشتہ روز بھارت کے میزائل حملوں کے شہدا کے لیے ترکیہ کے بھائیوں کی دعائوں اور نیک خواہشات کا خیر مقدم کرتے ہیں۔

محمد شہباز شریف نے کہا کہ انہوں نے ترکیہ کے صدر کو پاکستان کی مسلح افواج کی طرف سے دشمن کو دلیرانہ اور پیشہ وارانہ برتری کے ساتھ جواب دینے کے حوالے سے آگاہ کیا، ہم اپنی علاقائی سالمیت اور خود مختاری کا ہر قیمت پرتحفظ یقینی بنائیں گے، جنوبی ایشیاء میں امن کے قیام اور کشیدگی میں کمی کے لیے ترکیہ کی کاوشوں کو سراہتے ہیں۔

(جاری ہے)

بتایا گیا ہے کہ بھارت کی جانب سے بلااشتعال جارحیت کرنے پرترکیہ کی جانب سے پاکستان کے ساتھ اظہار یکجہتی کیا، ترکیہ کے وزیر خارجہ حاقان فدان کا پاکستان کے نائب وزیر اعظم اسحاق ڈار سے ٹیلیفونک رابطہ ہوا، اس دوران انہوں نے بھارت کی جانب سے بلااشتعال جارحیت، پاکستانی خودمختاری کی خلاف ورزی اور بے گناہ شہریوں کی شہادت پر گہری تشویش کا اظہار کیا، ترکیہ نے پاکستان کی حمایت کرتے ہوئے قریبی تعاون برقرار رکھنے پر اتفاق کیا ہے۔

اس موقع پر ترک وزیر خارجہ نے پاکستان کی حمایت کا اظہار کرتے ہوئے بھارت کی کارروائی کو پاکستان کی خودمختاری کی بلا اشتعال خلاف ورزی قرار دیا، انہوں نے پاکستان کے ساتھ ترکیہ کی مکمل یکجہتی کا اعادہ کیا اور علاقائی سیکیورٹی کی بگڑتی ہوئی صورتحال پر تشویش ظاہر کی، دونوں رہنماؤں نے موجودہ حالات پر قریبی رابطے میں رہنے اور باہمی مشاورت جاری رکھنے پر اتفاق کیا۔