یونیسف پاکستان کی ٹیم کی مشیر صحت سے ملاقات، زچہ و بچہ کی صحت، حفاظتی ٹیکہ جات کے منصوبوں کی تعریف

جمعرات 8 مئی 2025 22:10

پشاور (اُردو پوائنٹ اخبارتازہ ترین - اے پی پی۔ 08 مئی2025ء) یونیسف پاکستان کی ٹیم نے ڈاکٹر گنٹر بوسری کی قیادت میں مشیر صحت خیبر پختونخوا احتشام علی خان سے پشاور میں ملاقات کی۔ ڈاکٹر گنٹر کے ہمراہ ڈاکٹر سفینہ عبداللہ (ہیلتھ مینیجر یونیسف پاکستان) اور ڈاکٹر انعام اللہ خان (ہیلتھ ٹیم لیڈ خیبر پختونخوا) بھی موجود تھے۔احتشام علی خان نے یونیسف ٹیم کو خوش آمدید کہا اور صوبائی حکومت کی صحت سے متعلق اقدامات پر بریفنگ دی۔

انہوں نے صحت کے نظام کو بہتر بنانے، زچہ و بچہ کی صحت، حفاظتی ٹیکہ جات اور ہنگامی ردعمل کے شعبوں میں یونیسف کی دیرینہ شراکت اور محکمہ صحت کے ساتھ قریبی تعاون کو سراہا۔ یونیسف ٹیم نے حکومت کی جانب سے بنیادی صحت کے شعبے کو مضبوط بنانے کی کوششوں، خصوصاً لیڈی ہیلتھ ورکرز ( ایل ایچ ویز) پروگرام کو بہتر بنانے کے منصوبوں کی تعریف کی۔

(جاری ہے)

مشیر صحت نے بتایا کہ صوبائی حکومت کی ٹیکس آمدن میں 57 فیصد اضافہ ہوا ہے، جس کی بدولت نئے صحت پروگرامز شروع کیے جا رہے ہیں۔

ڈاکٹر گنٹر نے تجویز دی کہ لیڈی ہیلتھ ورکرز کی کارکردگی اور نوزائیدہ بچوں کی نگہداشت کے لیے درکار اخراجات کو مقامی وسائل سے پورا کرنے پر غور کیا جائے، تاکہ اضافی آمدن کو مؤثر طریقے سے استعمال کیا جا سکے۔یونیسف ٹیم نے ڈائریکٹر جنرل ہیلتھ سروسز ڈاکٹر محمد سلیم سے ان کے دفتر میں بھی ملاقات کی۔