ض*گورنر خیبرپختونخوا سے وفاقی وزیر پٹرولیم علی پرویز ملک کی اسلام میں ملاقات

جمعرات 8 مئی 2025 23:00

/ُپشاور(اُردو پوائنٹ اخبارتازہ ترین - آن لائن۔ 08 مئی2025ء)گورنر خیبرپختونخوا فیصل کریم کنڈی سے جمعرات کے روز وفاقی وزیر پٹرولیم علی پرویز ملک نے اسلام میں انکی رہائشگاہ پر ملاقات کی،ملاقات میں صوبے میں تیل و گیس کی پیداوار، گھریلو و صنعتی صارفین کو گیس کی فراہمی، اور دیگر اہم امور پر تفصیلی تبادلہ خیال کیا گیا۔اس موقع پر رکن خیبر پختونخوا اسمبلی احمد کریم کنڈی، وائس چیئرمین انجمن ہلال احمر خیبر پختونخوا فرزند وزیر بھی موجود تھے۔

ملاقات کے دوران گورنر خیبرپختونخوا نے وفاقی وزیر کو ضلع ڈیرہ اسماعیل خان کے علاقے کوٹ پالک میں حالیہ تیل و گیس کی دریافت سے متعلق کہا کہ کوٹ پالک کے گیس ذخائر سے مذکورہ علاقے کی مقامی آبادی کو مفت گیس کی فراہمی سمیت تحصیل ہیڈ کوارٹر درابن اور ڈی آئی خان شہر کو ضلع کرک کی طرز پر نئے گیس کنکشنز فراہم کئے جائیں، تاکہ مقامی آبادی اپنے علاقے کے قدرتی وسائل سے براہ راست مستفید ہو سکے۔

(جاری ہے)

گورنرخیبرپختونخوا نے وفاقی وزیر پٹرولیم سے ڈی آئی خان شہر میں گیس کے کم دباؤ کا مسئلہ بھی اجاگر کیا اور تجویز دی کہ شہر میں مزید نئے ٹاؤن بورڈنگ اسٹیشن (TBS) کی تنصیب عمل میں لائی جائے تاکہ گیس پریشر کا مسئلہ مستقل بنیادوں پر حل ہو سکے۔گورنر نے پشاور سمیت صوبے کے دیگر صنعتی مراکز میں صنعتکاروں کے تحفظات سے بھی وفاقی وزیر کو آگاہ کیا۔ انہوں نے کہا کہ پشاور کی صنعتی شعبہ کے گیس ٹیرف میں کمی اور مناسب نرخ مقرر کیے جائیں تاکہ صوبے میں صنعت کو فروغ ملے، جس کا براہِ راست فائدہ ملکی معیشت کو بھی ہوگا۔وفاقی وزیر پٹرولیم پرویز ملک نے گورنر خیبرپختونخوا کی تجاویز سے اتفاق کرتے ہوئے یقین دلایا کہ ان سفارشات پر عملدرآمد کے لیے ضروری اقدامات اٹھائے جائیں گے۔#