سکھر : ممکنہ بارشوں اور سیلابی صورتحال کے پیش نظر سکھر انتظامیہ کا اجلاس

سکھر (اُردو پوائنٹ اخبارتازہ ترین - اے پی پی۔ 09 مئی2025ء) سکھر میں ممکنہ بارشوں اور سیلابی صورتحال سے بچائو کے سلسلے میں اجلاس منعقد کیا گیا ۔ جاری کئے گئے اعلامیہ کے مطابق ایڈیشنل ڈپٹی کمشنر ٹو سکھر بشریٰ منصور کی زیر صدارت ممکنہ بارشوں، سیلاب اور قدرتی آفات سے بچاؤ کے لیے پیشگی تیاریوں کا جائزہ لینے کے سلسلے میں ڈسٹرکٹ ڈیزاسٹر مینجمنٹ اتھارٹی (ڈی ڈی ایم اے) کا ایک اہم اجلاس منعقد ہوا۔

اس موقع پر ایڈیشنل ڈپٹی کمشنر ٹو بشریٰ منصور نے کہا کہ ممکنہ بارشوں سے قبل تمام تیاریاں مکمل کر لی جائیں اور تمام ادارے مل کر کام کریں تاکہ عوام کی جان و مال کی حفاظت کو یقینی بنایا جا سکے۔ اے ڈی سی بشریٰ منصور نے میونسپل حکام کو ہدایت دیتے ہوئے کہا کہ ممکنہ سیلاب اور بارشی پانی کے نکاسی کے مسائل سے نمٹنے کے لیے ڈسپوزل اسٹیشن کو مکمل طور پر فعال بنایا جائے اور اسٹینڈ بائی جنریٹرز کی موجودگی کو یقینی بنایا جائے۔

(جاری ہے)

انہوں نے کہا کہ ہنگامی صورت حال میں رابطے کو مضبوط بنانے کے لیے ڈسٹرکٹ ڈیزاسٹر ایمرجنسی کنٹرول روم ڈی سی آفس میں قائم کیا گیا ہے جس کے لیے اے ڈی سی-ٹو کو فوکل پرسن مقرر کیا گیا ہے۔ انہوں نے بتایا کہ ایمرجنسی کنٹرول روم 24 گھنٹے فعال رہے گا جس میں تمام محکموں کے افسران شفٹ وائز ڈیوٹی سر انجام دیں گے تاکہ کوآرڈینیشن کو مزید مضبوط بنایا جا سکے۔

ایڈیشنل ڈپٹی کمشنر ٹو نے میونسپل کارپوریشن کے افسران کو ہدایت کی کہ بڑھتی ہوئی گرمی کے پیش نظر گزشتہ سال کی طرح اس بار بھی ان ہی جگہوں پر ہیٹ اسٹروک کیمپس بھی لگائے جائیں۔ انہوں نے کہا کہ تمام محکموں کے افسران کسی بھی ہنگامی صورت حال سے نمٹنے کے لیے ہر وقت تیار رہیں۔ اس موقع پر ڈسٹرکٹ ہیلتھ آفیسر یاسر گبول نے بتایا کہ ہر حوالے سے تیاری مکمل ہے، ہسپتالوں میں الرٹ جاری کر دیا گیا ہے، ڈاکٹروں سمیت تمام پیرامیڈیکل اسٹاف کو پابند بنانے کے حوالے سے آگاہی دی گئی ہے، ہسپتالوں میں ایمبولینسز اور دوائیوں کی موجودگی کو بھی یقینی بنایا جائے گا۔ اجلاس میں ریونیو، پولیس، رینجرز، میونسپل، صحت سمیت دیگر تمام متعلقہ محکموں کے افسران نے بھی شرکت کی۔