Live Updates

پاکستانی حرم گائیڈزمسجد الحرام میں حاجیوں کی رہنمائی اور مدد کرنے میں اہم کردار ادا کر رہے ہیں، وزارت مذہبی امور

جمعہ 9 مئی 2025 16:25

مکہ المکرمہ (اُردو پوائنٹ اخبارتازہ ترین - اے پی پی۔ 09 مئی2025ء) وزارت مذہبی امور نے کہا ہے کہ عقیدت سے لبریز دلوں اور فرض شناسی کے جذبے کے ساتھ پاکستانی حرم گائیڈز مسجد الحرام میں حاجیوں کی رہنمائی اور مدد کرنے میں اہم کردار ادا کر رہے ہیں۔ وزارت مذہبی امور کے ترجمان نے کہا کہ اپنی ذمہ داریوں سے بڑھ کر، پاکستانی معاونین نہ صرف پاکستانی حاجیوں کی خدمت کر رہے ہیں بلکہ دیگر ممالک کے حاجیوں کی بھی مدد کر رہے ہیں۔

خواہ یہ کسی بزرگ حاجی کو راستہ دکھانا ہو، مختلف زبانوں میں رہنمائی فراہم کرنا ہو یا زیادہ بھیڑ والے علاقوں میں حاجیوں کے لیے آسانی پیدا کرنا ہو، ان کی موجودگی ہزاروں حاجیوں کے لیے سکون اور رہنمائی کا ذریعہ ہے۔ پاکستانی معاونین حج نے ایک ہندوستانی حاجی خاندان کو بھی بروقت مدد فراہم کی جو مسجد الحرام میں راستہ بھٹک کر اپنے گروپ سے جدا ہو گیا تھا۔

(جاری ہے)

ان کی یہ کوششیں پاکستان کی مہمان نوازی اور حج کی مقدس سفر کے احترام کی عکاس ہیں۔ حج کے موسم کے پیش نظر ان معاونین کی بے لوث خدمات جاری ہیں، جو دنیا بھر سے آنے والے حاجیوں کی طرف سے سراہی جا رہی ہیں اور اتحاد، خدمت اور ایمان کی حقیقی روح کو مضبوط کر رہی ہیں۔ یہاں یہ بات قابل ذکر ہے کہ وزارت مذہبی امور و بین المذاہب ہم آہنگی نے پاکستانی حاجیوں کے لیے حج کے سفر کو آسان بنانے کے لیے اہم قدم اٹھاتے ہوئے دیگر حکومتی اداروں سے معاونین کا انتخاب نیشنل ٹیسٹنگ سروس (این ٹی ایس) کے ذریعے کیا تھا تاکہ سعودی عرب میں پاکستانی حاجیوں کی سہولت فراہم کی جا سکے۔

واضح رہے کہ گزشتہ سال منیٰ میں ایک حج معاون آصف بشیر کے ہیٹ سٹروک سے جاں بلب 17 انڈین شہریوں کی جانیں بچانے پر انڈین وزیر اقلیتی امور کی جانب سے تعریفی خط جاری کیا گیا تھا جبکہ حکومت پاکستان نے تیسرے اعلی ترین سول ایوارڈ سے نوازا تھا۔