Live Updates

پاکستان نے عالمی قوانین کے مطابق بھارتی جارحیت کا جواب دیا ، تنازعہ کشمیر کا حل ناگزیر ہے، حریت کانفرنس

ہفتہ 10 مئی 2025 17:43

سرینگر (اُردو پوائنٹ اخبارتازہ ترین - اے پی پی۔ 10 مئی2025ء) بھارت کے غیر قانونی زیر قبضہ جموںوکشمیر میں کل جماعتی حریت کانفرنس نے پاکستان اور بھارت کے درمیان بڑھتی ہوئی کشیدگی کی بنیادی وجہ تنازعہ کشمیر کو قرار دیتے ہوئے کہا ہے کہ پاکستان نے عالمی قوانین کے مطابق بھارتی جارحیت کا ایک موثر جواب دیا ہے۔

(جاری ہے)

کشمیر میڈیاسروس کے مطابق کل جماعتی حریت کانفرنس کے ترجمان ایڈووکیٹ عبدالرشید منہاس نے سرینگر میں جاری ایک بیان میں کہا کہ بھارت نے پاکستان کی سالمیت اور خودمختاری کے خلاف اشتعال انگیز اقدامات کیے اوروہ معصوم بچوں سمیت بیگناہ پاکستانی شہریوں کے قتل عام کو چھپانے کے لیے دہشتگرد کیمپوں کا بے بنیاد دعوی کر رہا ہے۔

انہوںنے کہا کہ بھارت گزشتہ 77برس سے مقبوضہ جموںوکشمیر میں ریاستی دہشت گردی کر رہا ہے اور اس نے اب تک آزادی کے مطالبے کی پاداش میں 5لاکھ کے قریب کشمیریوں کو شہید کیا ہے ۔ ترجمان نے کہا کہ بھارتی ہٹ دھرمی اور غرور وتکبر کی وجہ سے اس خطے پر ایٹمی جنگ کے بادل منڈلا رہے ہیں اور اب وقت آگیا ہے کہ ا قوام متحدہ آگے آئے اور جموںوکشمیر کے بارے میں اپنی کردہ قراردادوں پر عملدرآمد کیلئے بھارت پر دبائو ڈالے۔