Live Updates

پاک افواج کی عظیم کامیابی پر پنجاب اسمبلی میں قرارداد جمع

10مئی کو ہر سال یومِ فتحِ پاکستان کے طور پر سرکاری سطح پر منایا جائے‘مطالبہ

پیر 12 مئی 2025 12:37

لاہور (اُردو پوائنٹ اخبارتازہ ترین - این این آئی۔ 12 مئی2025ء) پاک افواج کی عظیم کامیابی پر پنجاب اسمبلی میں قرارداد جمع کرا دی گئی۔ممبر صوبائی اسمبلی پنجاب سارہ احمد اور مہوش سلطانہ کی جانب سے پاک افواج کی عظیم کامیابی پر پنجاب اسمبلی میں قرارداد جمع کرائی گئی۔قرارداد میں کہا گیا کہ پنجاب اسمبلی کا یہ ایوان مطالبہ کرتا ہے کہ 10مئی کو ہر سال یومِ فتحِ پاکستان کے طور پر سرکاری سطح پر منایا جائے، یہ ایوان پاکستان کی مسلح افواج کو مئی 2025کی جنگ میں عظیم کامیابی پر مبارکباد دیتا ہے، بھارت کی جانب سے طاقت کا توازن بدلنے کی کوشش ناکام ہوئی۔

جمع کرائی گئی قرارداد کے مطابق پاکستان نے حکمت، تحمل اور عسکری مہارت سے دشمن کو فیصلہ کن شکست دی، پاکستان نے صرف عسکری اہداف کو نشانہ بنا کر اخلاقی برتری بھی ثابت کی، بھارتی عسکری ساز و سامان، بشمول رافیل، براہموس اور ایس 400ناکام ہوگئے۔

(جاری ہے)

قرارداد میں کہا گیا کہ پاکستان اور چین کا اتحاد اب خطے میں نئی عسکری حقیقت بن چکا ہے، یہ ایوان آرمی چیف جنرل عاصم منیر، جوائنٹ چیفس آف سٹاف کمیٹی جنرل ساحر شمشاد مرزا، پاک فضائیہ، بحریہ اور آپریشن بنیان مرصوص کے تمام شرکا کو خراجِ تحسین پیش کرتا ہے۔

قرارداد میں مزید کہا گیا کہ یہ ایوان ان شہدا اور معصوم بچوں کو خراج تحسین پیش کرتا ہے جنہوں نے اپنی جانوں کا نذرانہ دے کر قوم کا سر فخر سے بلند کیا، پاکستان ہمیشہ زندہ باد، افواجِ پاکستان پائندہ باد۔