Live Updates

زرعی یونیورسٹی پشاور کی پاکستان گرل گائیڈز ایسوسی ایشن کے تعاون سےتین روزہ تربیتی ورکشاپ

پیر 12 مئی 2025 17:30

پشاور (اُردو پوائنٹ اخبارتازہ ترین - اے پی پی۔ 12 مئی2025ء) زرعی یونیورسٹی پشاور نے پاکستان گرل گائیڈز ایسوسی ایشن کے تعاون سے ’’ سٹے سیف پراجیکٹ ‘‘ کی زیرنگرانی تین روزہ تربیتی ورکشاپ کا کامیاب انعقادکیا۔اس تربیت کا مقصد طالبات میں خود اعتمادی پیدا کرنا، ذاتی تحفظ اور نوجوان خواتین میں قائدانہ صلاحیتوں کو بڑھانا تھا۔ اس حوالے سے یونیورسٹی کے یوتھ ڈویلپمنٹ سنٹر نے ایک تقریب کا انعقاد کیا جس کے مہمان خصوصی وائس چانسلر پروفیسر ڈاکٹر جہان بخت تھے۔

اختتامی تقریب سے خطاب کرتے ہوئے وائس چانسلر نے مکمل تعاون کا یقین دلایا اور کہا کہ معیاری تعلیم و تحقیق کے ساتھ ساتھ ہماری یونیورسٹی طلباء کی کردارسازی بھی کر رہی ہے۔ یونیورسٹی کی طالبات پاکستان گرل گائیڈز ایسوسی ایشن کے پروجیکٹ سٹے سیف میں بڑھ چڑھ کر حصہ لیں تاکہ وہ مستقبل میں اس کے ثمرات حاصل کر سکیں۔

(جاری ہے)

انہوں نے کہا کہ اس تربیت سے یونیورسٹی میں طالبات کی کردارسازی میں مدد ملے گی اور گرل گائیڈز ایسوسی ایشن کے پلیٹ فارم سے انہیں مختلف سرگرمیوں جیسا کہ ابتدائی طبی امداد کی تربیت، ماحولیاتی آلودگی کے خاتمے اور درخت لگانے کی مہم وغیرہ میں متحرک کیا جائے گا۔

ڈائریکٹر یوتھ ڈویلپمنٹ سنٹر ڈاکٹر انور علی شاد اور ڈپٹی ڈائریکٹر ڈاکٹر حمیرا وسیلہ نے شرکاء کو خوش آمدید کہا۔ اس موقع پر پاکستان گرل گائیڈز ایسوسی ایشن کی صوبائی سیکرٹری مہوش گل، ٹرینر ماہ نور عامر اور پراجیکٹ سٹے سیف کی ٹرینر ثمینہ بشیر بھی موجود تھیں۔وائس چانسلر پروفیسر ڈاکٹر جہان بخت نے تربیت میں حصہ لینے والے طالبات میں تعریفی اسناد تقسیم کئے۔