اکھنڈ بھارت کا خواب ختم ہو گیا ،وہ جاہلانا رویہ چلا گیا،راجہ شبیر خان

بدھ 14 مئی 2025 16:41

مظفرآباد(اُردو پوائنٹ اخبارتازہ ترین - این این آئی۔ 14 مئی2025ء)اکھنڈ بھارت کا خواب ختم ہو گیا ہے۔وہ جاہلانا رویہ چلا گیا ہے۔ان خیالات کا اظہار سیاسی و سماجی ہر دلعزیز شخصیت راجا شبیر خان نے گزشتہ روز پاک فوج سے اظہار یکجہتی ریلی کے موقع پر میڈیا سے گفتگو کرتے ہوئے کیا۔راجہ شبیر خان نے کہا کہ بھارتی وزیراعظم نریندر مودی وہ شخص ہے جسے‘‘نئے بھارت’’کا معمار کہا جاتا تھا،جو دنیا بھر میں زور سے سنا جاتا تھا،اب ایک ابھرتے ہوئے توازن کے سائے میں آ چکا ہے۔

پاکستان، جسے کبھی ایک ناکام ریاست سمجھا جاتا تھا جبکہ ریاست آزاد جموں وکشمیر کو تر نوالہ،اب چین کے ویسٹرن تھیٹر کمانڈ کی درپردہ تزویراتی حمایت حاصل ہے،جو کسی بھی مستقبل کی جھڑپ میں آزاد جموں وکشمیر اور پاکستان کی علاقائی سالمیت کی ضمانت بنے گا۔

(جاری ہے)

طاقت کا توازن مستقل طور پر بدل چکا ہے۔راجہ شبیر خان کا مذید کہنا تھاکہ مودی اب ہر حال میں پیچھے ہٹے گا۔

اس لیے نہیں کہ وہ چاہتا ہے،بلکہ اس لیے کہ اب ان کے پاس اور کوئی راستہ نہیں۔جو ایک‘‘سرجیکل اسٹرائیک’’سمجھا جا رہا تھا،وہ اب تکنیکی، سیاسی، اور نظریاتی شکست بن چکا ہے۔ بھارت پاکستان تنازع اب یکطرفہ نہیں رہا،بلکہ یہ خطے کی طاقت کا توازن بن چکا ہے،جو ڈرامے سے نہیں، بلکہ پاکستان چین کے فوجی اتحاد کی گہرائی سے تشکیل پایا ہے۔انہوں نے کہا ریاست آزاد جموں وکشمیر کے وزیراعظم چوہدری انوار الحق اور وزیراعظم پاکستان شہباز شریف سمیت چیف آف آرمی اسٹاف،چیف آف نیول سٹاف اور چیف آف ائیر سٹاف سمیت بری بحری اور فضائی افواج کے شیر دل آفیسران جوانوں کو شاندار کارکردگی پر خراج تحسین جبکہ شھداء کو خراج عقیدت اور زخمیوں کی جلد صحت یابی کیلئے دعا گو ہیں اور بھرپور تعاون کا یقین دلاتے ہیں۔