کوہستان‘40 ارب کا اسکینڈل، 12 ملزمان سے خطیر رقم اور سونا برآمد

ملزمان سے ایک ارب انسٹھ کروڑبرآمد کی گئی جس میں پاکستانی کرنسی، امریکی ڈالر اور سونا شامل

جمعرات 15 مئی 2025 16:34

کوہستان (اُردو پوائنٹ اخبارتازہ ترین - این این آئی۔ 15 مئی2025ء)پاکستان کی تاریخ کے سب سے بڑے مالیاتی اسکینڈل میں قومی احتساب بیورو (نیب) نے اہم کارروائی کرتے ہوئے کوہستان میں چالیس ارب روپے کے کرپشن کیس میں ملوث ملزمان کے گھروں پر چھاپے مارے ہیں۔ بارہ اہم ملزمان سے ایک ارب انسٹھ کروڑ روپے کی خطیر رقم برآمد کرلی گئی ہے، جس میں پاکستانی کرنسی، امریکی ڈالر اور سونا شامل ہے۔

ذرائع کے مطابق کارروائی گرفتار کلرک کے انکشافات پر عمل میں لائی گئی، جس نے دورانِ تفتیش اہم راز فاش کیے۔

(جاری ہے)

یہ کرپشن مبینہ طور پر سی اینڈ ڈبلیو (کمیونیکیشن اینڈ ورکس) کے تعمیراتی منصوبوں میں کی گئی۔ہری پور میں واقع ایک گولڈ لیب کے مالک عمران کو بھی حراست میں لے لیا گیا ہے، جہاں سے ساڑھے تین کروڑ روپے مالیت کا سونا برآمد کیا گیا۔ مزید تحقیقات کے دوران تین دیگر افراد کے گھروں سے بھی تین کلوگرام سونا برآمد ہوا ہے۔نیب حکام کا کہنا ہے کہ ابتدائی طور پر بارہ ملزمان کی شناخت ہوچکی ہے تاہم ان کے نام فی الحال خفیہ رکھے جا رہے ہیں۔ اب تک پچاس سے زائد افراد سے تفتیش کی جا چکی ہے اور تحقیقات کا دائرہ کار مزید وسیع کیا جا رہا ہے۔