جی ایچ کیو حملہ کیس‘پی ٹی آئی خواتین ونگ کی سربراہ کنول شوزب کی بیرون ملک روانگی کی اجازت کیلئے دائر درخوست خارج

اگر ملزمہ بیرون ملک چلی گئی تو ٹرائل میں رکاوٹ پیدا ہوسکتی ہے ‘سرکاری وکیل کا موقف

جمعرات 15 مئی 2025 22:55

راولپنڈی (اُردو پوائنٹ اخبارتازہ ترین - آن لائن۔ 15 مئی2025ء) انسداد دہشت گردی راولپنڈی کی خصوصی عدالت نے جی ایچ کیو حملہ کیس میں نامزد تحریک انصاف خواتین ونگ کی سربراہ کنول شوزب کی بیرون ملک روانگی کی اجازت طلب کرنے کیلئے دائر درخوست خارج کر دی ہے۔ عدالت نے یہ درخواست سرکاری وکیل کے اعتراضات و دلائل کی روشنی میں مسترد کی۔ گزشتہ روز سماعت کے موقع پر سپیشل ظہیر شاہ نے موقف اختیار کیا کہ درخواست گزار 9 مئی سے متعلق راولپنڈی ڈویژن میں درج 12 مقدمات میں نامزد ملزمہ ہیں ابھی تک 9 مئی سے متعلق صرف ایک مقدمہ میں فرد جرم عائد ہوئی ہے اور باقی 11 مقدمات میں فرد جرم عائد ہونا باقی ہے جبکہ فرد جرم عائد کرنے کے لئے ملزمہ کی حاضری ضروری ہے۔

اگر ملزمہ بیرون ملک چلی گئی تو ٹرائل میں رکاوٹ پیدا ہوسکتی ہے وکیل کا موقف تھا کہ فیملی کا کوئی اور فرد یا والد امریکہ جاکر بیٹے کی گریجویشن تقریب میں شرکت کر سکتاہے۔

(جاری ہے)

9 مئی سے متعلق مقدمات کی سماعت کے حوالے سے سپریم کورٹ کی ڈائریکشن بھی آچکی ہے جس پر عدالت نے درخواست خارج کردی یاد رہے کہ کنول شوزب نے امریکہ روانگی کی اجازت طلب کرنے کے لئے رواں ماہ 3 مئی کو درخواست دائر کی تھی درخواست میں کہا گیا تھا کہ بیٹا امریکہ میں زیر تعلیم ہے جس کی گریجویشن تقریب میں شرکت کے لئے کالج نے دعوت دے رکھی ہے بیٹے کی گریجویشن تقریب 18 مئی کو منعقد ہونا ہے لہٰذا ایک ماہ کے لئے امریکہ روانگی کی اجازت دی جائے،