حیدر آباد سکھر موٹر وے کو ترقیاتی پروگرام کا حصہ نہ بنانے پر قومی اسمبلی میں بحث

اسلام آباد (اُردو پوائنٹ اخبارتازہ ترین - این این آئی۔ 15 مئی2025ء)ڈپٹی سپیکر قومی اسمبلی نے وزیر منصوبہ بندی کو حیدر آباد سکھر موٹر وے منصوبے کیلئے رقم مختص کرنے سے متعلق ایوان کو اعتماد میں لینے کی ہدایت کردی۔ جمعرات کو قومی اسمبلی اجلاس میں حیدر آباد سکھر موٹر وے منصوبے کو پی ایس ڈی میں شامل نہ کرنے سے متعلق توجہ دلا نوٹس پر شرمیلا فاروقی نے اظہار خیال کرتے ہوئے کہا کہ پنجاب کے منصوبوں پر کام ہورہا ہے لیکن اس منصوبے پر کام نہیں کیا جارہا ۔

یہ سندھ کے ساتھ بہت بڑی زیادتی ہوگی ۔وزیر مملکت ارمغان سبحانی نے توجہ دلا نوٹس پر جواب دیتے ہوئے کہا کہ یہ اہم نوعیت کا حامل منصوبہ ہے اور اسے ترجیحی بنیادوں پر لیا جارہا ہے۔ یہ منصوبہ مکمل ہوگا۔ اس میں آذربائیجان دلچسپی رکھتا ہے۔

(جاری ہے)

سکھر حیدر آباد موٹروے سب سے پہلی ترجیح ہے۔پارلیمانی سیکرٹری گل اصغر خان نے بتایا کہ اس منصوبے کے لیے قرض کا بندوبست کیا جارہا ہے۔

رکن اسمبلی آغا رفیع اللہ نے کہا کہ دنیا میں کوئی ایک موٹروے بتائیں جو پورٹ سے جڑی نہ ہو۔ اس موٹروے کے لیے مکمل بجٹ نہ رکھا تو بجٹ میں ووٹ نہیں دینا چاہیے ۔وزیر مملکت ارمغان سبحانی نے کہا کہ مکمل بجٹ کی شرط نہ رکھیں، یہ ہماری ترجیحات میں شامل ہے۔ سکھر حیدرآباد کراچی موٹروے مکمل ہوگا۔ اگر فارن فنڈنگ یا انویسٹر دلچسپی دکھائے تو بہت جلد یہ موٹر وے بن جائے گی۔

وزیر خزانہ محمد اورنگزیب نے اظہار خیال کرتے ہوئے کہا کہ حکومت سکھر حیدر موٹروے کے حوالے سے بڑا واضح مقف رکھتی ہے۔ یقین دہانی کروانا چاہتا ہوں کہ یہ موٹروے بنائی جائے گی۔سید نوید قمر نے کہا کہ توجہ دلا نوٹس میں کہا گیا کہ فیڈرل پی ایس ڈی پی میں پیسے نہیں رکھے گئے۔ اس وقت جو پی ایس ڈی پی بن رہی ہے، اس میں موٹروے کے مطابق رقم نہیں رکھی جارہی۔

خالی باتیں 15 سال سے سن رہے ہیں، گرانڈ پر کیا ہے۔اعجاز جاکھرانی نے کہا کہ یقین دہانی کے بجائے پراجیکٹ کے لیے پیسے رکھے جائیں، جس پر وزیر خزانہ نے جواب دیا کہ میں وزیر منصوبہ بندی کو پیغام پہنچا دوں گا کہ اس منصوبے کے لیے پیسے رکھے جائیں۔سید عبدالقادر گیلانی نے کہا کہ حکومت جھوٹ بول رہی ہے۔ وزارت منصوبہ بندی میں سنجیدگی نہیں دکھائی جارہی۔

جنوبی پنجاب اور سندھ کے ساتھ امتیازی سلوک برتا جارہا ہے۔ اس موقع پر ایم کیو ایم کے رکن سید حفیظ الدین نے پیپلز پارٹی کے موقف کی تائید کی۔وفاقی وزیر پارلیمانی امور طارق فضل چوہدری نے کہا کہ پیپلز پارٹی اور ایم کیو ایم ہمارے اتحادی ہیں، یہ مسئلہ بیٹھ کر حل کر لیں گے۔بعد ازاں ڈپٹی اسپیکر نے وزیر منصوبہ بندی احسن اقبال کو کل ایوان کو اعتماد میں لینے کی ہدایت کردی۔