حکومت زراعت کے فروغ پریقین رکھتی ہے، تمباکوکی فصل یا زمین داروں پر کوئی نیاٹیکس نہیں لگایاگیا، وزیرقانون اعظم کاقومی اسمبلی میں جواب

جمعہ 16 مئی 2025 14:00

اسلام آباد (اُردو پوائنٹ اخبارتازہ ترین - اے پی پی۔ 16 مئی2025ء) وفاقی وزیرقانون اعظم نذیرتارڑ نے کہاہے کہ تمباکوکی فصل یا زمین داروں پرنئے ضوابط یا کوئی نیاٹیکس نہیں لگایاگیا، حکومت زراعت کے فروغ اورکسانوں کوتمام سہولیات فراہم کرنے پریقین رکھتی ہے۔ جمعہ کوقومی اسمبلی کے اجلاس میں سیدوسیم اور اسدقیصر کی طرف سے تمباکو کی فصل کے حوالہ سے سے اٹھائے گئے امورپر پروفاقی وزیرقانون اعظم نذیر تارڑنے ایوان کوبتایا کہ وزیراعظم محمدشہبازشریف کی قیادت میں حکومت زراعت کے فروغ اورکسانوں کوتمام سہولیات فراہم کرنے پریقین رکھتی ہے۔

انہوں نے کہاکہ تمباکو کی دوبڑی ملٹی نیشنل کمپنیاں 250ارب روپے ٹیکس اداکرتی ہیں جبکہ ان کامارکیٹ شئیر44فیصدہے اس کے مقابلہ میں مقامی کمپنیوں کامارکیٹ میں حصہ 56فیصدہے جبکہ ٹیکس میں ان کاحصہ تین فیصدسے زیادہ نہیں ہے۔

(جاری ہے)

انہوں نے کہاکہ تمباکو کے شعبہ میں ایک اندازے کے مطابق 200ارب روپے سے لیکر300ارب روپے تک کاگیپ ہے، انہوں نے کہاکہ تمباکوکی فصل یا زمین داروں پرنئے ضوابط یا کوئی نیاٹیکس نہیں لگایاگیاہے البتہ جب فصل کسانوں سے پراسیسنگ میں جاتی ہے تو وہاں پرحکومت کی مداخلت شروع ہوجاتی ہے۔

انہوں نے کہاکہ خام صورت میں تمباکو کے حوالہ سے کچھ تجاویز سامنے ہیں ، حکومت کسانوں کے مسائل سے آگاہ ہے، پاکستان کی زاعت ملکی معیشت میں کلیدی کردار اداکررہاہے۔ وزیراعظم نے بیجوں میں بہتری اورپلانٹ پروٹیکشن پرخصوصی توجہ دی ہے۔ انہوں نے کہاکہ جوانڈسٹری پیسے بنارہی ہے یہ اس کی ذمہ داری ہے کہ وہ قومی خزانہ میں اپناحصہ ڈالے ۔ وفاقی وزیرنے کہاکہ سید وسیم نے جومعاملات اٹھائے ہیں ان پر وہ متعلقہ حلقوں سے خود رابطہ کریں گے۔