لندن میں پاکستان ہاؤس میں یومِ تشکر کی پروقار تقریب

لندن (رپورٹ ساجد عزیز، اُردو پوائنٹ اخبارتازہ ترین۔ 16 مئی2025ء) برطانیہ میں پاکستان کے ہائی کمشنر ڈاکٹر محمد فیصل کی سرکاری رہائش گاہ “پاکستان ہاؤس” میں بھارتی جارحیت کے خلاف ہر محاذ پر کامیابی کی خوشی میں یومِ تشکر کی ایک پُروقار تقریب کا انعقاد کیا گیا، جس میں افواجِ پاکستان کے افسران، برٹش پاکستانی کمیونٹی کے رہنما، پریس منسٹر علی نواز ملک، ہائی کمیشن کے حکام، اور مختلف شعبہ ہائے زندگی سے تعلق رکھنے والے ممتاز افراد نے بڑی تعداد میں شرکت کی۔

ہائی کمشنر ڈاکٹر محمد فیصل نے تقریب سے خطاب اور میڈیا سے گفتگو کرتے ہوئے کہا کہ پاکستانی مسلح افواج نے بھارتی اشتعال انگیزی کا منہ توڑ جواب دیا، اور دنیا نے پاکستانی افواج کی پیشہ ورانہ مہارت، دلیری اور تحمل کو تسلیم کیا ہے۔

(جاری ہے)

اُنہوں نے کہا کہ جس طرح پوری قوم نے ایک بڑے دشمن کے حملے کے خلاف متحد ہو کر ردِعمل دیا، وہ ہمیشہ کے لیے تاریخ کا حصہ بن گیا ہے۔

ڈاکٹر محمد فیصل نے کہا کہ جنگ بندی کے لیے برطانیہ کا رویہ مثبت اور متوازن رہا، جبکہ پاکستانی میڈیا نے بھی اس نازک موقع پر ذمے دارانہ اور مؤثر کردار ادا کیا۔ انہوں نے کہا کہ ہماری قوم ہر آزمائش میں یکجہتی کا عملی مظاہرہ کرتی ہے، جو ہمارے قومی تشخص کی پہچان ہے۔ ہائی کمشنر کا کہنا تھا کہ اگر بھارت ابتدائی طور پر آزادانہ تحقیقات پر آمادگی ظاہر کرتا تو اُسے بین الاقوامی سطح پر رسوائی کا سامنا نہ کرنا پڑتا۔

انہوں نے واضح کیا کہ پاکستان اور بھارت کے درمیان اصل اور بنیادی تنازع مسئلہ کشمیر ہے، جس کا پُرامن اور منصفانہ حل ہی خطے میں دیرپا امن کی بنیاد بن سکتا ہے۔ تقریب میں شریک شرکاء نے کہا کہ فرانسیسی ساختہ جنگی طیاروں کو طاقت کی علامت سمجھنے والوں کو اب بخوبی اندازہ ہو گیا ہے کہ اصل طاقت جدید ہتھیاروں میں نہیں بلکہ ان کو چلانے والے باصلاحیت، پرعزم اور جذبے سے لبریز پائلٹس اور سپاہیوں میں ہوتی ہے۔

یومِ تشکر کی اس تقریب نے قوم کے جذبہ حب الوطنی، افواجِ پاکستان سے محبت، اور ملک کے دفاع میں قومی یکجہتی کے جذبے کو ایک بار پھر اجاگر کیا۔ حاضرین نے افواجِ پاکستان اور ریاستی اداروں کے ساتھ یکجہتی کا بھرپور اظہار کیا اور دعا کی کہ پاکستان ہمیشہ امن، ترقی اور استحکام کی راہ پر گامزن رہے اس موقع پر جمعہ کی نماز پاکستان ہاؤس میں ادا کی گئی جس میں وطنِ عزیز پاکستان کی سلامتی، خودمختاری اور ترقی کے لیے خصوصی دعائیں کی گئیں۔ یومِ تشکر کی یہ روح پرور تقریب وطن سے محبت، اتحاد، اور قومی حمیت کی عکاس تھی۔