Live Updates

سرینگر، شہید میر واعظ مولوی محمد فاروق کی برسی 21 مئی کو منائی جائے گی

ہفتہ 17 مئی 2025 16:34

سرینگر (اُردو پوائنٹ اخبارتازہ ترین - اے پی پی۔ 17 مئی2025ء) بھارت کے غیر قانونی زیر تسلط جموں وکشمیر میں تحریک آزادی کے ممتاز رہنما شہید میر واعظ مولوی محمد فاروق کی برسی 21 مئی کو منائی جائے گی۔میر واعظ مولوی محمد فاروق کو نامعلوم مسلح افراد نے میں 21مئی 1990کو سرینگر میں ان کی رہائشی پر گولیاں مار کر شہید کر دیا تھا۔کشمیر میڈیاسرو س کے مطابق کل جماعتی حریت کانفرنس کے سینئر رہنما اور انجمن اوقاف جامع مسجد سرینگر کے سربراہ میر واعظ عمر فاروق نے اپنے والد کی 35ویں برسی کے سلسلے میں کئی تقریبات کے انعقاد کا اعلان کیا ہے۔

ان تقریبات کا آغاز 18مئی سے ہوگا جو 21مئی تک جاری رہیں گی۔ 18مئی کو انجمن اوقات کے زیر اہتمام جامع مسجد سرینگر میں دن گیارہ بجے قرآن خوانی اور تلاوت قرآن کے مقابلے کا انعقاد کیا جائے،19مئی کو سرینگر کے گنج بخش پارک نوہٹہ میں میر واعظ فائونڈیشن کے زیر اہتمام دن گیارہ بجے بلڈ ڈونیشن کیمپ لگایا جائے گا، 20مئی کو انجمن نصرت الاسلام کے زیر اہتمام اسلامیہ ہائر سیکنڈری اسکول راجوری کدل کے آڈیٹوریم میں ”منشیات سے پاک کشمیر کی تعمیر - طلبااور معاشرے کا کردار“ کے عنوان سے صبح دس بجے سیمینار کا انعقاد ہوگاجبکہ 21مئی بروز بدھ مزار شہدا عید گاہ سرینگر پر صبح ساڑھے دس بجے فاتحہ خوانی کی تقریب ہو گی۔

(جاری ہے)

میرواعظ عمر فاروق نے اپنےبیان میں لوگوں سے اپیل کی ہے کہ وہ ان تقریبات میں شرکت کر کے میر واعظ مولوی محمد فاروق اور دیگر شہداکے ساتھ عقیدت و احترام کا اظہار کریں۔