Live Updates

10 مئی کو افواج پاکستان نے بھارت کا غرور خاک میں ملادیا، ابتسام الٰہی ظہیر

افواج پاکستان ملک کی جغرافیائی سرحدوں کی محافظ ہے اور علمائے اسلام نظریاتی سرحدوں کے محافظ ہیں، چیئرمین قرآن وسنہ موومنٹ

شاہد نذیر چودھری پیر 19 مئی 2025 14:06

10 مئی کو افواج پاکستان نے بھارت کا غرور خاک میں ملادیا، ابتسام الٰہی ..

لاہور( اُردو پوائنٹ اخبارتازہ ترین۔ 19 مئی 2025ء ) قرآن وسنہ موومنٹ پنجاب کے زیراہتمام خیابان جناح روڈ پر ’’دفاع پاکستان ریلی‘‘ کا انعقاد کیا گیاجو مرکز بیت العتیق سے شروع ہو کرچھتری چوک پر ختم ہوئی۔ چیئرمین قرآن وسنہ موومنٹ علامہ ابتسام الٰہی ظہیر نے ریلی کے شرکاء سے خطاب کرتے ہوا کہا کہ بھارت صرف پاکستان کا ہی نہیں بلکہ اسلام کا دشمن ہے۔

بھارت نے مرید کے اور بہاولپور کی مساجد پہ حملہ کیا جبکہ افواج پاکستان نے آپریشن بنیان مرصوص کے ذریعے 10 مئی کو بھارت کا غرور خاک میں ملادیا۔ قیام پاکستان کے بعد ہونے والی جنگوں میں بھارت کو ہمیشہ ہزیمت کا سامنا کرنا پڑا لیکن بھارت ہمیشہ اپنے جارحانہ عزائم کو عملی جامہ پہنانے کے لیے کوئی نہ کوئی ساز ش تیار کرتا رہتا ہے لیکن ہر سازش کے بعد اس کو منہ کی کھانی پڑتی ہے۔

(جاری ہے)

انہوں نے کہا جب محمد بن قاسم رحمۃ اللہ علیہ بر صغیر میں اپنے ساتھیوں سمیت داخل ہوئے تو ان کے مقابلے پر راجہ داہر کی افواج بالکل بے بس اور کمزور ثابت ہوئی۔محمود غزنوی ، غوری، تغلق ،غلاماں اور مغلوں نے طویل عرصے تک بر صغیر پر حکومت کی اور ہندو کسی بھی طور پر مسلمانوں کا مقابلہ کرنے کی جرات نہ کر سکے۔ ریلی کے شرکاء سے خطاب کرتے ہوئےت علامہ ابتسام الٰہی ظہیر نے کہا کہ پاکستانی قوم اور فوج کے درمیان اعتماد کا جو غیر متزلزل رشتہ ہے‘ اس کی وجہ سے دشمن کبھی بھی کامیابی سے ہمکنار نہیں ہو سکتا۔

اس جنگ کی وجہ سے دنیا بھر میں پاکستان کے وقار میں بہت زیادہ اضافہ ہوا اور پاکستان کو ایک جرات مند ،بہادر اور باوقار ریاست کے طور پر ایک نئی شناخت حاصل ہوئی ہے۔ مستقبل کےچیلنجز کا مقابلہ کرنے کے لیے بھی پاکستانی قوم اللہ تعالیٰ کے فضل و کرم سے پوری طرح آ مادہ و تیار ہے اور پاک فوج کی پشت پر کھڑی ہے۔ قرآن وسنہ موومنٹ کے زیر اہتمام دفاع پاکستان ریلی کے شرکاء سے چیئرمین پنجاب ڈاکٹر شفیق الرحمان زاہد، قیم الٰہی ظہیر، قاری احمد قمر ،مولانا کوثر زمان اور ڈاکٹر صلاح الدین نے گفتگو کرتے ہوئے کہ ہم دفاع پاکستان کے لیے پاکستان کے قومی اداروں اور افواج پاکستان کا بھرپورساتھ دیںگے۔