سڑکوں ،گلیوں اور محلوں میں پانی کاچھڑکائو لازمی کیاجائے،شمسہ مہ جبین

کراچی (اُردو پوائنٹ اخبارتازہ ترین - این این آئی۔ 19 مئی2025ء)صدائے انسانیت سوشل ویلفیئر آرگنائزیشن کی چیئرپرسن شمسہ مہ جبین نے حکومتی اداروں سے مطالبہ کیا ہے کہ وہ ہیٹ اسٹروک اور ہیٹ ویو سے بچاؤ کے لیے فوری اقدامات اٹھائیں اور شہری علاقوں میں سڑکوں، گلیوں اور محلوں میں پانی کا چھڑکاؤ لازمی قرار دیں۔ شمسہ مہ جبین نے کہا کہ پاکستان میں گرمی کی شدت میں اضافے کے ساتھ ہی ہیٹ اسٹروک اور ہیٹ ویو کے خطرات بھی بڑھتے جا رہے ہیں اور اس سے شہریوں کی صحت کو سنگین خطرات لاحق ہیں۔

انہوں نے مزید کہا کہ پانی کا چھڑکاؤ سڑکوں اور گلیوں کی سطح کو ٹھنڈا رکھنے اور فضا میں نمی کی مقدار کو بڑھانے میں مددگار ثابت ہوگا، جس سے ہیٹ اسٹروک کے اثرات کو کم کیا جا سکتا ہے۔ اس عمل سے گرمی کی شدت کا مقابلہ کرنے کے ساتھ ساتھ ماحول میں نمی کی سطح بھی بڑھ جائے گی، جو انسانی جسم کو ٹھنڈا رکھنے میں مدد فراہم کرتی ہے۔

(جاری ہے)

شمسہ مہ جبین نے حکومتی اداروں سے درخواست کی کہ وہ اس اقدام کو فوری طور پر نافذ کریں اور شہر کے مختلف حصوں میں پانی کے چھڑکاؤ کے اسٹیشنز قائم کریں تاکہ شہریوں کو اس شدید گرمی سے بچایا جا سکے۔

ان کا کہنا تھا کہ یہ نہ صرف عوام کی صحت کے لیے اہم ہے بلکہ اس سے گرمی کی شدت کو کم کرنے میں مدد ملے گی، جو ہیٹ اسٹروک جیسے سنگین مسائل کا سبب بن سکتی ہے۔اس کے ساتھ ساتھ، انہوں نے شہر میں صفائی ستھرائی کے انتظامات میں فوری بہتری کی ضرورت پر بھی زور دیا۔ شمسہ مہ جبین نے کہا کہ شہر میں کچرے کے ڈھیر، کیچڑ اور گندگی عوامی صحت کے لیے سنگین خطرہ بن چکے ہیں اور ان کی فوری نکاسی ضروری ہے۔

انہوں نے حکومتی اداروں سے مطالبہ کیا کہ وہ صفائی کے نظام کو فعال کریں اور شہر بھر میں کیچڑ و گندگی کی فوری نکاسی کو یقینی بنائیں۔اس کے علاوہ، شمسہ مہ جبین نے مچھر مار اسپرے اور حشرات الارض کی تلفی کے لیے ضروری اقدامات کرنے کی ضرورت پر بھی زور دیا تاکہ ملیریا اور ڈینگی جیسی بیماریوں سے بچا جا سکے۔ انہوں نے کہا کہ یہ اقدامات شہریوں کی صحت کو محفوظ بنانے اور موسمی بیماریوں کے پھیلاؤ کو روکنے کے لیے انتہائی اہم ہیں۔

شمسہ مہ جبین کا کہنا تھا کہ صدائے انسانیت سوشل ویلفئر آرگنائزیشن ہمیشہ عوام کی فلاح و بہبود کے لیے کام کر رہی ہے اور اس بار بھی اس کا مقصد حکومتی اداروں سے فوری طور پر ان اہم اقدامات کی درخواست کرنا ہے تاکہ شہریوں کو ہیٹ ویو، صفائی کے مسائل اور صحت کے دیگر خطرات سے محفوظ رکھا جا سکے۔ ان کا کہنا تھا کہ شہریوں کی زندگیوں کی حفاظت اور شہر کے ماحول کی بہتری کے لیے فوری اور موثر اقدامات اٹھانے کی ضرورت ہے تاکہ گرمی کے اثرات کو کم کیا جا سکے اور بیماریوں کے پھیلاؤ کو روکا جا سکے۔