توہین عدالت کیس ‘ وزیر اعلیٰ خیبر پختونخوا علی امین گنڈا پور کی درخواست پر جیل حکام سے جواب طلب

پیر 19 مئی 2025 20:54

اسلام آباد (اُردو پوائنٹ اخبارتازہ ترین - آن لائن۔ 19 مئی2025ء) اسلام آباد ہائی کورٹ نے عدالتی حکم کے باوجود بانی پی ٹی آئی سے ملاقات نہ کروانے پر توہین عدالت کیس میں وزیر اعلیٰ خیبر پختونخوا علی امین گنڈا پور کی درخواست پر جیل حکام سے جواب طلب کرلیاہے۔عدالت نے کہاہے کہ ابھی ہم صرف جیل حکام سے جواب مانگ لیتے ہیں،جسٹس ارباب محمدطاہرنے درخواست گزارکوخبردارکیاہے کہ ہم ریکارڈ منگوا لینگے اگر کچھ غلط بیانی ثابت ہوئی تو آپ کو جرمانہ عائد کرینگے۔

پیرکوجسٹس ارباب محمد طاہر نے علی امین گنڈا پور کی درخواست پر سماعت کی۔

(جاری ہے)

وکیل درخواست گزار راجہ ظہور الحسن ایڈوکیٹ عدالت میں پیش ہوئے اور موقف اختیار کیاکہ اس عدالت کے حکم کے باوجود ہماری ملاقات نہیں کروائی گئی، اس عدالت کے ستمبر اور اکتوبر 2024 کے آرڈر کی خلاف ورزی ہوئی یے،جسٹس ارباب محمد طاہر نے پوچھاکہ کیا آرڈر تھا ہمارا جس کی خلاف ورزی ہوئی یے، اس پروکیل نے بتایا کہ عدالت نے کورڈینیٹر کے ذریعے ملاقات کا کہا تھا، جسٹس ارباب محمد طاہرنے کہاکہ آپ ستمبر اور اکتوبر2024 کی بات کر رہے ہیں اب 2025 ہے، آپ چاہتے ہیں ہم کوآرڈینیٹر کے خلاف کارروائی کریں اسے پکڑیں، ہم ریکارڈ منگوا لینگے اگر کچھ غلط بیانی ثابت ہوئی تو آپ کو جرمانہ عائد کرینگے، ہم نے کوارڈینیٹر کے ذریعے ملاقات کا کہا تھا کیا ملاقات نہیں ہوئی اسکے بعد ،وکیل نے بتایا کہ گزشتہ ہفتے ہم اڈیالہ جیل گئے لیکن ملاقات نہیں ہوئی، اس پرعدالت نے جیل حکام سے جواب طلب کرتے ہوئے سماعت غیر معینہ مدت تک کیلئے ملتوی کر دی۔