بارشوں کے باعث مانسہرہ میں 2 روز کیلئے سکول بند‘ مری میں بھی چھٹی دیدی گئی

مری/مانسہرہ ( اُردو پوائنٹ اخبارتازہ ترین۔ 18 اگست 2025ء ) ملک میں جاری مون سون کی شدید بارشوں کے باعث مانسہرہ میں 2 روز کیلئے سکول بند کردیئے گئے اس کے علاوہ انتظامیہ نے مری کے تعلیمی اداروں میں بھی چھٹی کا اعلان کردیا۔ میڈیا رپورٹس کے مطابق ضلع مانسہرہ میں طوفانی بارشوں اور سیلاب کے باعث تعلیمی ادارے بند کرنے کا فیصلہ کرتے ہوئے ضلعی انتظامیہ نے نوٹیفکیشن جاری کردیا، ڈی سی مانسہرہ کا کہنا ہے کہ مون سون بارشوں کے پیش نظر تمام سکول 2 روز کے لیے بند رہیں گے، مون سون بارشوں کے پیش نظر حفاظتی اقدامات کے طور پر یہ فیصلہ کیا گیا، سکول 19 اگست تک بند رہیں گے تاکہ طلبہ اور عملے کو کسی قسم کے خطرے سے بچایا جا سکے۔

بتایا گیا ہے کہ مری میں بھی 2 روز کے لیے تعلیمی اداروں میں چھٹی کا اعلان کردیا گیا، پی ڈی ایم اے پنجاب کی ہدایات کے پیشِ نظر مری انتظامیہ نے آئندہ 2 روز کے لیے تعلیمی اداروں میں چھٹی کا اعلان کیا، ڈپٹی کمشنر مری کی جانب سے نوٹیفکیشن بھی جاری کردیا گیا کیوں کہ مری میں شدید بارش اور لینڈ سلائیڈنگ کا خدشہ ہے، آج بھی مری میں صبح سے اب تک تقریباً 74 ملی میٹر بارش ریکارڈ کی گئی۔

(جاری ہے)

علاوہ ازیں سٹی ٹریفک پولیس نے مری جانے والے سیاحوں کیلئے ٹریفک ایڈوائزری بھی جاری کی ہے، سی ٹی او مری وسیم اختر نے سیاحوں کے لیے سفری ایڈوائزری جاری کی جس میں کہا گیا ہے کہ حالیہ بارشوں کے پیش نظر سیاح پہاڑی علاقوں کے سفر سے اجتناب کریں، مری میں بارش کے دوران گاڑی کی رفتار کم رکھیں، دوران ڈرائیونگ جلد بازی اور ڈبل لائن بنانے سے اجتناب کریں، دو طرفہ ٹریفک چلنے کی وجہ سے غلط اوور ٹیکنگ سے گریز کریں، دوران سفر سیاح اپنی گاڑی کو مناسب اور محفوظ جگہ پر پارک کریں، مری میں لینڈ سلائیڈنگ کے خطرات موجود ہیں لہذا غیر ضروری سفر سے گریز کریں۔

ترجمان ٹریفک پولیس مری نے کہا کہ چیف ٹریفک آفیسر مری وسیم اختر اور ڈی ایس پی ٹریفک مری خود فیلڈ میں موجود ہیں، چیف ٹریفک آفیسر مری وسیم اختر نے کہا کہ شدید بارش اور ممکنہ دھند کی صورت میں فوگ لائٹ اور ڈبل اشاروں کا استعمال کریں، سیاحوں کی سہولت کے لئے اضافی نفری تعینات کر دی گئی ہے، شدید دھند اور دوران بارش شہری غیر ضروری سفر سے گریز کریں، سیاحوں سے گزارش ہے مختص شدہ جگہ پر اپنی گاڑی پارک کریں، غلط پارکنگ سے اجتناب کریں، لینڈ سلائیڈنگ ہونے کی صورت میں ڈائیورشن پوائنٹس پر موجود ٹریفک سٹاف سے تعاون کریں، سیاح کسی بھی ایمرجنسی کی صورت میں ٹریفک کنٹرول نمبر 0519269200 پر کال کریں۔

ترجمان پی ڈی ایم اے کا کہنا ہے کہ آئندہ 2 روز کے دوران راولپنڈی، مری، جہلم، چکوال اور اٹک میں مزید بارشوں کی پیشگوئی ہے، ممکنہ طوفانی بارشوں اور کلاؤڈ برسٹنگ کے خدشے کے پیش نظر شہریوں کے تحفظ کے لیے تمام تر وسائل بروئے کار لائے جا رہے ہیں۔