وفاقی وزیر صحت سید مصطفی کمال کی چینی ہم منصب سے جنیوا میں ملاقات،صحت کے شعبے میں تعاون کو مزید فروغ دینے کے عزم کا اظہار

پیر 19 مئی 2025 22:20

اسلام آباد (اُردو پوائنٹ اخبارتازہ ترین - اے پی پی۔ 19 مئی2025ء) وفاقی وزیر صحت سید مصطفی کمال نے چینی ہم منصب سے جنیوا میں جاری 78ویں ورلڈ ہیلتھ اسمبلی کے اجلاس کے دوران ملاقات کی، ملاقات میں صحت کے شعبہ میں دوطرفہ تعاون اور باہمی دلچسپی کے امور پر تبادلہ خیال کیا گیا۔وفاقی وزارت صحت کی جانب سے جاری پریس ریلیز کے مطابق وفاقی وزیر صحت مصطفی کمال کی ورلڈہیلتھ اسمبلی کے اجلاس کے دوران سائیڈ لائن میٹنگز کا سلسلہ جاری ہے۔

وفاقی وزیرسید مصطفی کمال نے پیر کے روز چینی ہم منصب سے ملاقات کی، دونوں وزرانے صحت کے شعبے میں تعاون کو مزید فروغ دینے کے عزم کا اظہار کیا۔وفاقی وزیر مصطفی کمال نے اس موقع پر گفتگو کرتے ہوئے کہا کہ پاک چین کی دوستی مثالی ہے، دونوں ملکوں کے عوام کے دل ایک دوسرےکیلئے دھڑکتے ہیں ۔

(جاری ہے)

انہوں نے کہا کہ وزیر اعظم محمدشہبازشریف کی ہدایت پر صحت کے شعبے میں اصلاحات کا سلسلہ جاری ہے ،دونوں ممالک صحت کے شعبے میں ایک دوسرے کے تجربات سے استفادہ کریں گے جبکہ صحت کے شعبے کی بہتری کیلئے تعاون کو مزید بڑھایا جائے گا۔

ملاقات کے دوران ویکسین کی تیاری، روایتی طب اور جدید طبی ٹیکنالوجیز کو بڑھانے کے امکانات پر تبادلہ خیال کیا گیا۔وفاقی وزیرنے کہا کہ ویکسینز اور ادویات کی مقامی سطح پرتیاری کو وسعت دینے کیلئے حکومت نے پختہ عزم کر رکھا ہے جس کا مقصد درآمدات پر انحصار کم کرنا اور پاکستان کے صحت کے نظام کو مضبوط بنانا ہے ۔یہ ملاقات دونوں ممالک کے مابین صحت کے شعبے کو مزید مضبوط کرنے کی جانب اہم پیش رفت ہے ۔