صدر مملکت کا خيبر پختونخوا میں بھارتی پراکسی فتنۃ الخوارج کے خلاف مختلف کامیاب کارروائیوں پر سیکورٹی فورسز کو خراج تحسین

پیر 19 مئی 2025 23:40

اسلام آباد (اُردو پوائنٹ اخبارتازہ ترین - اے پی پی۔ 19 مئی2025ء) صدر مملکت آصف علی زرداری نے خيبر پختونخوا میں بھارتی پراکسی فتنۃ الخوارج کے خلاف مختلف کامیاب کارروائیوں پر سیکورٹی فورسز کو خراج تحسین پیش کیا اور 9 خوارج کو جہنم واصل کرنے پر سیکیورٹی فورسز کی بہادری کو سراہا ہے۔

(جاری ہے)

ایوان صدر کے پریس ونگ سے پیر کو جاری بیان کے مطابق صدر مملکت نے شمالی وزیرستان میں کارروائی کے دوران جامِ شہادت نوش کرنے والے 2 بہادر جوانوں کو خراج عقیدت پیش کیا، صدر مملکت نے لانس نائیک صابر آفریدی اور سپاہی فرہاد علی طوری کے جذبہ حب الوطنی اور بہادری کو سراہا۔

صدر مملکت نے وطن کیلئے جان کا نذرانہ پیش کرنے پر قوم کے بہادر سپوتوں کو خراج عقیدت پیش کیا اور کہا کہ پاکستان کی بہادر افواج بھارتی پراکسی فتنۃ الخوارج کی سرکوبی کیلئے کامیاب کارروائیاں کررہی ہیں۔ صدر مملکت نے دہشتگردی کے مکمل خاتمے تک کارروائیاں جاری رکھنے کے عزم کا اعادہ کیا اور کہا کہ پوری قوم دہشت گردی کے خلاف جنگ میں اپنی سیکیورٹی فورسز کے ساتھ ہے۔ صدر آصف علی زرداری نے شہداء کیلئے بلندی درجات اور شہداء کے اہل خانہ کیلئے صبر جمیل کی دعا کی۔