Live Updates

ڈاکٹر خالد مقبول صدیقی کی جانب سے جنرل عاصم منیر کو فیلڈ مارشل کے عہدے پر ترقی پر مبارکباد

منگل 20 مئی 2025 22:10

کراچی(اُردو پوائنٹ اخبارتازہ ترین - این این آئی۔ 20 مئی2025ء)ایم کیو ایم پاکستان کے چیئرمین ڈاکٹر خالد مقبول صدیقی نے چیف آف آرمی اسٹاف جنرل عاصم منیر کو فیلڈ مارشل کے معزز و اعلی ترین فوجی عہدے پر ترقی پانے پر دل کی گہرائیوں سے مبارکباد پیش کی ہے۔

(جاری ہے)

ڈاکٹر خالد مقبول صدیقی نے بہادر آباد میں پارٹی کے مرکزی دفتر سے جاری اپنے بیان میں کہا کہ جنرل عاصم منیر کی قیادت میں پاکستان کی مسلح افواج نے نہ صرف بھارت کو عسکری میدان میں منہ توڑ جواب دیا بلکہ اعصابی جنگ میں بھی شاندار حکمت عملی کا مظاہرہ کیا، جس سے پاکستان کے دفاع کو ناقابل تسخیر بنانے میں مدد ملی۔

انہوں نے کہا کہ جنرل عاصم منیر کی فہم و فراست، جرات اور قیادت نے پوری قوم کا سر فخر سے بلند کر دیا ہے۔ ایم کیو ایم پاکستان کے چیئرمین نے مزید کہا کہ فیلڈ مارشل کا عہدہ جنرل عاصم منیر کی غیر معمولی خدمات، وفاداری اور ملک و قوم کے لیے انتھک جدوجہد کا اعتراف ہے، جو نہ صرف مسلح افواج بلکہ پوری قوم کے لیے باعثِ فخر ہے۔ انہوں نے دلی نیک تمناں کا اظہار کرتے ہوئے اس امید کا اظہار کیا کہ جنرل عاصم منیر کی قیادت میں پاکستان مزید ترقی کرے گا اور دشمنوں کے ناپاک عزائم ہمیشہ ناکام ہوں گے۔