Live Updates

ٹاؤن میں ناجائز تجاوزات کسی صورت برداشت نہیں کی جائیں گی، منصور احمد شیخ

کھلی سڑکوں اور ٹریفک کی روانی سے عوامی مشکلات میں نمایاں کمی آئے گی، چیئرمین صدر ٹاؤن

بدھ 21 مئی 2025 17:32

کراچی (اُردو پوائنٹ اخبارتازہ ترین - این این آئی۔ 21 مئی2025ء)پاکستان تحریک انصاف کراچی ڈویژن کے سینئر نائب صدر اور چیئرمین صدر ٹاؤن منصور احمد شیخ نے کہا ہے کہ شدید گرمی کے پیش نظر صدر ٹاؤن کے شہریوں کو ہیٹ اسٹروک سے بچانے کے لیے فوری اور مثر اقدامات جاری ہیں۔ متعلقہ اداروں کو ہدایات جاری کر دی گئی ہیں تاکہ عوام کو ریلیف فراہم کیا جا سکے۔

انہوں نے کہا کہ صدر ٹاؤن کی باشعور عوام نے پی ٹی آئی کو ووٹ دے کر مجھے بطور چیئرمین منتخب کیا ہے، اور میں ان کے اعتماد پر پورا اترنے کے لیے ہر ممکن کوشش کر رہا ہوں۔ عوامی مسائل کے حل کے لیے عملی طور پر میدان میں موجود ہوں۔منصور احمد شیخ کا کہنا تھا کہ صدر ٹان میں پانی کی فراہمی، سڑکوں کی تعمیر، سیوریج کے نظام کی بہتری، پارکوں کی بحالی، وائی فائی زونک، اسٹریٹ لائٹ کی بحالی سمیت کئی اہم منصوبے مکمل ہو چکے ہیں۔

(جاری ہے)

علاقہ مکینوں کو جدید شہری سہولیات فراہم کی جا رہی ہیں تاکہ وہ بہتر طرزِ زندگی سے مستفید ہو سکیں۔انہوں نے کہا کہ صدر ٹاؤن میں ناجائز تجاوزات کسی صورت برداشت نہیں کی جائیں گی۔ کھلی سڑکوں اور ٹریفک کی روانی سے عوامی مشکلات میں نمایاں کمی آئے گی۔ اس سلسلے میں شہری انتظامیہ کے ساتھ بھرپور تعاون جاری ہے تاکہ بلاتفریق عوام کی خدمت کی جا سکے۔

انہوں نے مزید کہا کہ پی ٹی آئی کے منشور کے مطابق عوامی خدمت کا مشن جاری ہے، اور یہ مشن کسی سیاسی مفاد یا گروہ بندی کے بغیر خالصتا عوامی خدمت پر مبنی ہے۔ ہم عمران خان کے سپاہی ہیں اور اپنے قائد کے وژن کے مطابق عوام کو کبھی مایوس نہیں کریں گے۔برسات کے موسم کی آمد کے پیش نظر برساتی نالوں کی صفائی سمیت تمام حفاظتی اقدامات مکمل کیے جا رہے ہیں تاکہ شہریوں کو کسی بھی پریشانی سے بچایا جا سکے۔منصور احمد شیخ نے کہا کہ ہم صدر ٹاؤن کو کراچی کا سب سے خوبصورت اور مثالی ٹان بنانے کے لیے پرعزم ہیں، اور ان شااللہ عوامی تعاون سے یہ خواب جلد حقیقت بنے گا۔