Live Updates

سپریم کورٹ، اسلام آباد ہائیکورٹ ججز ٹرانسفر اور سنیارٹی کیس کی سماعت 23مئی تک ملتوی

بدھ 21 مئی 2025 20:00

اسلام آباد (اُردو پوائنٹ اخبارتازہ ترین - اے پی پی۔ 21 مئی2025ء) سپریم کورٹ کے آئینی بینچ نے اسلام آباد ہائیکورٹ میں ججز ٹرانسفر اور سنیارٹی کیس کی سماعت جمعہ 23مئی تک ملتوی کردی۔بدھ کو سپریم کورٹ کے جسٹس محمد علی مظہر کی سربراہی میں پانچ رکنی آئینی بنچ نے اسلام آباد ہائیکورٹ ججز ٹرانسفر اور سنیارٹی سے متعلق کیس کی سماعت کی۔ بنچ کے دیگر ممبران میں جسٹس نعیم اختر افغان ، جسٹس شاہد بلال حسن ، جسٹس صلاح الدین پنھور اور جسٹس شکیل احمد شامل تھے۔

اس موقع پر وکیل بانی پی ٹی آئی ادریس اشرف نے دلائل جاری رکھے۔دوران سماعت جسٹس شاہد بلال حسن نے وکیل ادریس اشرف کو درخواست کا پیراگراف نمبر 4 پڑھنے کی ہدایت کرتے ہوئے کہا کہ آپ نے لکھا کیا ہے؟ کیا ملکی تاریخ میں کسی سیاسی لیڈر نے کبھی ایسی درخواست دائر کی؟جسٹس شاہد بلال حسن نے ریمارکس دیئے کہ میرا دل تو درخواست جرمانے کے ساتھ خارج کرنے کا ہے۔

(جاری ہے)

جسٹس محمد علی مظہر نے ریمارکس دیئے کہ ماضی میں تبادلے کی میعاد تھی، 18 ویں ترمیم میں میعاد کو نکال دیا گیا ہے، اب تو جج تقرری کا اختیار جوڈیشل کمیشن کا ہے۔جسٹس محمد علی مظہر نے کہا کہ ججز نے تو ایسا نہیں کہا، میرے متعلق یہ الفاظ استعمال ہوتے تو مجھے بھی شرمندگی ہوتی۔بانی پی ٹی آئی کے وکیل ادریس اشرف نے درخواست سے دستبردار ہوتے ہوئے کہا کہ عمران خان کی درخواست میں سینئر وکیل شعیب شاہین ہیں، میں نے راجا مقسط کی جانب سے دائر درخواست لکھی ہے جس میں ایسے الفاظ نہیں لکھے۔

ادریس اشرف کے دلائل مکمل ہونے کے بعد کراچی بار ایسوسی ایشن کے وکیل فیصل صدیقی نے دلائل کا آغاز کیا۔ جسٹس محمدعلی مظہر نے ریمارکس دیئے کہ ٹرانسفر ہونے والے 2 ججز سنیارٹی لسٹ میں سب سے نیچے ہیں۔بعدازاں آئینی بنچ نے مزید سماعت جمعہ 23مئی تک ملتوی کردی۔آئندہ سماعت پر کراچی بار کے وکیل فیصل صدیقی دلائل جاری رکھیں گے۔