Live Updates

سردار عتیق کا شہباز شریف کے دورہ مظفر آباد کا خیر مقدم

بھارتی جارحیت کے شہداء و زخمیوں کو وفاقی پیکیج میں شامل کرنے پر وزیراعظم پاکستان کے شکر گزار ہیں، سابق وزیراعظم آزاد کشمیر

جمعرات 22 مئی 2025 20:29

مظفرآباد(اُردو پوائنٹ اخبارتازہ ترین - این این آئی۔ 22 مئی2025ء) آل جموں وکشمیرمسلم کانفرنس کے صدر وسابق وزیراعظم سردارعتیق احمدنے وزیراعظم اسلامی جمہوریہ پاکستان میاں شہباز شریف کادورہ مظفرآبادکاخیر مقدم کرتے ہوئے کہا کہ شہباز شریف کے دورے سے کشمیریوں کے حوصلے بلند ہوئے ہیں ۔انڈین فائرنگ میں آزادکشمیر کے شہداء اور زخمیوں کو وفاقی پیکج میں شامل کرنے پر شکریہ ادا کرتے ہیں۔

ہمارے مطالبے پر چیف آف آرمی سٹاف جنرل سید عاصم منیر کو فیلڈ مارشل کے عہدے پر ترقی دینے پروزیراعظم پاکستان میاں شہباز شریف اور کابینہ کا شکریہ ادا کرتے ہیں جنہوں نے آرمی چیف کی دفاع وطن کیلئے گراں قدر خدمات اور آپریشن بنیان مرصوص کے ذریعے خطے میں طاقت کے توازن کو قائم کرنے کیلئے اقدامات پر انہیں فیلڈ مارشل کے عہدے پر ترقی دی گئی۔

(جاری ہے)

ان خیالات کااظہارانہوں نے وزیراعظم پاکستان میاں شہباز شریف سے ملاقات کے بعد میڈیا سے گفتگو کرتے ہوئے کیا۔انہوں نے کہا کہ پوری کشمیری قوم کو آرمی چیف جنرل سید عاصم منیر اور انکی قیادت میں اپنی بہادر افواج کے غازیان و شہدا اور ان کے اہل خانہ پر فخر ہے۔پاکستان نے بھارت کو جواب دیا تو پوری دنیا کو بتایا، افواج پاکستان نے ثابت کیا کہ ہمیں اپنی سرحدوں کی حفاظت کرنی آتی ہے، پاکستان محفوظ ہاتھوں میں ہے۔

آپریشن بنیان مرصوص نہ صرف ایک بڑی عسکری کامیابی ہے بلکہ اس نے پاکستان کی دفاعی صلاحیت اور قومی عزم کا بھرپور مظاہرہ بھی کیا ہے۔انہوں نے کہا کہ وزیراعظم پاکستان میاں شہباز شریف کادورہ مظفرآباد نیک شگون ہے جس سے اس پار کشمیریوں میں بھی مثبت پیغام گیا ہے۔ وزیراعظم پاکستان میاں شہباز شریف کا پاک بھارت کشیدگی میں جو کردار تھا وہ لائق تحسین ہے جسے کشمیری قوم قدر کی نگاہ سے دیکھتی ہے ۔میاں شہباز شریف کا مسئلہ کشمیر کے حوالے سے واضح اور دو ٹوک موقف پر پوری کشمیری قوم ان کی شکرگزار ہے ۔انہوں نے کہا کہ پاک بھارت کشیدگی اس وقت تک ختم نہیں ہوسکتی جب تک مسئلہ کشمیر حل نہیں ہو جاتا ہے۔مسئلہ کشمیر کے حل کے بغیرجنوبی ایشیاء میں امن کا قیام ممکن نہیں ہوسکتا۔