”میں اپنا وعدہ نبھا رہاہوں“ آئی ایس پی آر نے معرکہ حق میں جانوں کا نذرانہ دینے والے شہدا اور غازیوں کے اعزاز میں نیا نغمہ ریلیز کردیا

دل سوز شاعری، ملی جذبے سے لبریزسحر انگیز گلوکاری کے باعث نغمہ سوشل میڈیا پر چھا گیا، یہ نغمہ 1965 کی اس جنگی فضا کی یاد تازہ کرتا ہے جب پوری قوم سیسہ پلائی دیوار بن کر افواج پاکستان کے شانہ بشانہ کھڑی تھی اور دشمن کو منہ توڑ جواب دیا گیا تھا

فیصل علوی جمعہ 23 مئی 2025 11:28

”میں اپنا وعدہ نبھا رہاہوں“ آئی ایس پی آر نے معرکہ حق میں جانوں کا ..

راولپنڈی(اردوپوائنٹ اخبار تازہ ترین۔23 مئی 2025)معرکہ حق میں وطن کیلئے جانوں کا نذرانہ دینے والے شہدا اور غازیوں کے اعزاز میں آئی ایس پی آر نے شاندار نغمہ ریلیز کر دیا،”میں اپنا وعدہ نبھا رہا ہوں“ کے عنوان سے جاری ہونے والا یہ نغمہ اپنی دل سوز شاعری، ملی جذبے سے لبریز دھن اور سحر انگیز گلوکاری کے باعث آتے ہی سوشل میڈیا پر چھا گیا،پاک فوج کے شعبہ تعلقات عامہ (آئی ایس پی آر) نے وطن کے عظیم سپوتوں، شہدا اور غازیوں کے اعزاز میں ایک نیا ملی نغمہ ریلیز کر کے قوم کے دلوں کو گرما دیا ہے۔

نغمے کے بول ”میں اپنا وعدہ نبھا رہا ہوں“ ہر اس فرد کی قربانی کا عکس پیش کرتے ہیں جنہوں نے وطن کی حفاظت کیلئے جانوں کے نذرانے پیش کئے۔نغمہ نہ صرف ملی و قومی جذبات کی ترجمانی کرتا ہے بلکہ تاریخ کی جھلک بھی پیش کرتا ہے۔

(جاری ہے)

یہ سن 1965 کی اس جنگی فضا کی یاد تازہ کرتا ہے جب پوری قوم سیسہ پلائی دیوار بن کر افواج پاکستان کے شانہ بشانہ کھڑی تھی اور دشمن کو منہ توڑ جواب دیا گیا تھا۔

نغمہ ان بے مثال قربانیوں کو خراجِ عقیدت پیش کرتا ہے اور یہ پیغام دیتا ہے کہ پاکستان کی سرزمین ان عظیم قربانیوں کی بدولت آج بھی سربلند ہے۔ نغمے کے ذریعے بھارت کو بھی واضح پیغام دیا گیا ہے کہ بزدل رات کی تاریکی میں وار کیا کرتے ہیں جب کہ بہادر قومیں اور ان کی افواج میدان جنگ میں اعلان کر کے اترتی ہیں۔نغمے کی ریلیز کے ساتھ ہی سوشل میڈیا پر بھرپور ردعمل دیکھنے میں آیا اور یہ نغمہ مختلف پلیٹ فارمز پر ٹاپ ٹرینڈز میں شامل ہو گیا۔

عوام کی جانب سے اسے زبردست پذیرائی مل رہی ہے اور اسے پاکستان کی ملی نغموں کی تاریخ میں ایک اہم اضافہ قرار دیا جا رہا ہے۔واضح رہے کہ اس سے قبل بھی پاکستانی قوم کی دلی آواز پر نیا ملی نغمہ ریلیز کر دیا گیاتھا۔ملی نغمے میں دل کو گرما دینے والی شاعری اور سحر انگیز آواز نے سماں باندھ دیا۔ جنگی ترانہ فوج کے شعبہ تعلقات عامہ (آئی ایس پی آر) کے آفیشل یوٹیوب چینل سے جاری کیا گیاتھا جسے اب تک لاکھوں لوگ دیکھ چکے تھے۔

نغمہ کے جوشیلے بول ”غالب ہیں خدا کا وار ہیں ہم، لڑنے کیلئے تیار ہیں ہم“ نے چار چاند لگا دئیے تھے۔ پاکستان دین اسلام کے نام پر وجود میں آیا اور اسکی فوج اسلام کی فوج ہے۔ جوش و ولولہ اور جذبوں سے بھرپور نغمہ جو نا صرف پاک فوج بلکہ اس قوم کے ہر فرد کے دل کی ترجمانی کرتا تھا۔دل گرما دینے والی شاعری اور سحر انگیز آواز نے سماں باندھ دیا۔ملی نغمے میں پاک فوج کی پیشہ ورانہ صلاحیتوں، قومی عزم، دفاع وطن کے جذبے کی عکاسی کی گئی تھی۔