کراچی، شوہر کی فائرنگ سے بیوی کے قتل کے ایک ہی دن میں 2واقعات

واقعات گلشن معمار اور اورنگی ٹان کے علاقوں میں پیش آئے، پولیس نے مقدمات درج کرلیے

جمعہ 23 مئی 2025 19:00

ْکراچی (اُردو پوائنٹ اخبارتازہ ترین - این این آئی۔ 23 مئی2025ء)شہر قائد میں شوہر کی فائرنگ سے بیوی کے قتل کے ایک ہی دن میں دو واقعات رونما ہوئے۔اورنگی ٹاون فرید کالونی میں شوہر نے فائرنگ کرکے بیوی کو قتل کردیا اورموقع سے فرار ہونے میں کامیاب ہوگیا۔مومن آباد تھانے کے علاقے اورنگی ٹاون سیکٹر 10 فرید کالونی میں گھر میں فائرنگ سے خاتون شدید زخمی ہو گئی، جسے فوری طور پر عباسی شہید اسپتال منتقل کیا گیا جہاں وہ زخموں کی تاب نہ لاتے ہوئے دم توڑگئی ۔

مقتولہ کی شناخت58 سالہ رخسانہ زوجہ گل شیر کے نام سے کی گئی ۔ایس ایچ او مومن آباد معراج انوار کے مطابق مقتولہ خاتون کو اس کے شوہرگل شیرنے فائرنگ کرکے قتل کیا ہے اور ملزم واقعے کے بعد موقع فرار ہوگیا ہے۔ انھوں نے بتایاکہ مقتولہ خاتون کا قتل خاندانی تنازع معلوم ہوتا ہے، تاہم پولیس نے جائے وقوع سے شواہد اکٹھے کرکے مفرور شوہر کی تلاش شروع کردی ہے ۔

(جاری ہے)

قبل ازیں کراچی میں گلشن معمار کے علاقے ملا عیسی گوٹھ معمار میں شوہر کی فائرنگ سے بیوی جاں بحق ہوگئی، جس کی لاش ایمبولینس کے ذریعے عباسی شہید اسپتال منتقل کی گئی۔ترجمان کراچی پولیس کے مطابق مقتولہ کی شناخت 22 سالہ اقصی سولنگی کے نام سے کی گئی۔مقتولہ کے ماموں انور علی سولنگی نے بتایا کہ مقتولہ کو اس کے شوہر اسماعیل چنہ نے تشدد کا نشانہ بنانے کے بعد سر پر گولی مار کر قتل کر دیا۔اطلاع ملنے پر پولیس موقع پر پہنچ گئی اور ملزم کو آلہ قتل( پستول) سمیت حراست میں لے کر تھانے منتقل کیا۔ مقتولہ نے تقریبا 6 ماہ قبل اسماعیل چنہ سے اپنے گھر والوں کی اجازت کے بغیر محبت کی شادی کی تھی جبکہ اسماعیل پہلے سے شادی شدہ اور 4 بچوں کا باپ ہے۔