Live Updates

برطانیہ میں سیاسی پناہ کیلئے درخواستیں دینے والوں میں پاکستانی سرفہرست

2023/24ء کے عرصے میں پاکستانی شہری انگلینڈ میں سیاسی پناہ کے خواہاں افراد میں دنیا بھر میں تیسرے نمبر پر تھے

ساجد علی ہفتہ 24 مئی 2025 11:14

برطانیہ میں سیاسی پناہ کیلئے درخواستیں دینے والوں میں پاکستانی سرفہرست

لندن ( اُردو پوائنٹ اخبارتازہ ترین۔ 24 مئی 2025ء ) برطانیہ میں سیاسی پناہ کیلئے درخواستیں دینے والوں میں پاکستانی شہری سرفہرست آگئے۔ میڈیا رپورٹس کے مطابق برطانیہ میں سیاسی پناہ تلاش کرنے والے افراد کی فہرست میں پاکستانی شہری پہلے نمبر پر پہنچ چکے ہیں، برطانوی وزارت داخلہ نے اپنے تازہ ترین اعداد و شمار میں بتایا ہے کہ گزشتہ برس 11 ہزار 48 پاکستانی شہریوں نے سیاسی پناہ کی درخواستیں جمع کرائیں، جو مجموعی طور پر 1 لاکھ 9 ہزار 343 درخواستوں کا ایک بڑا حصہ ہے، اس سے پہلے 2023/24ء کے عرصے میں پاکستانی شہری سیاسی پناہ کے خواہاں افراد میں تیسرے نمبر پر تھے، تاہم اس سال پاکستانیوں شہریوں کا اس لسٹ میں پہلا نمبر ہے۔

بتایا گیا ہے کہ اس فہرست میں افغان شہریوں نے 8 ہزار 69 درخواستوں کے ساتھ دوسرا نمبر حاصل کیا ہے، چھوٹی کشتیوں میں سمندری راستے خطرناک سمندری سفر کرکے برطانیہ پہنچنے والے مہاجرین میں سے 33 فیصد نے سیاسی پناہ کی درخواستیں جمع کروائی ہیں، یہ اعداد و شمار مہاجرین کے لیے ان خطرناک سفروں کی سنگینی کو اجاگر کرتے ہیں، اس سے ظاہر ہوتا ہے کہ خطے میں سیاسی عدم استحکام اور معاشی مشکلات مہاجرت کے اہم محرکات ہیں۔

(جاری ہے)

اس حوالے سے ماہرین کا کہنا ہے کہ پاکستانی شہریوں کی بڑھتی ہوئی تعداد کئی عوامل کا نتیجہ ہوسکتی ہے، جن میں ملک میں معاشی عدم استحکام، سیاسی کشیدگی اور روزگار کے محدود مواقع شامل ہیں، یہ اعداد و شمار نا صرف پاکستان بلکہ پورے خطے کے سماجی و اقتصادی حالات کے بارے میں اہم اور غور طلب امور کی نشاندہی کرتے ہیں، ان اعداد و شمار سے یورپی ممالک کے لیے مہاجرت کے بحران سے نمٹنے کے لیے جامع پالیسیاں بنانے کی ضرورت کو عکاسی ہوتی ہے۔