بھارتی مصنف نے مودی کی ذہنیت اور زیر اثر علاقوں کو ڈفر زون قرار دے دیا

ہفتہ 24 مئی 2025 15:31

نئی دہلی (اُردو پوائنٹ اخبارتازہ ترین - این این آئی۔ 24 مئی2025ء)معروف بھارتی مصنف اور بلاگر اوے شکلا نے وزیراعظم نریندر مودی کی ذہنیت، سوچ اور اس کے زیر اثر بھارتی علاقوں کو ڈفر زون قرار دے دیا۔

(جاری ہے)

میڈیارپورٹس کے مطابق بھارتی صحافی کرن تھاپر کو انٹرویو میں اوے شکلا نے کہا کہ ڈفر زون دراصل ایک ذہنیت کا نام ہے جہاں تعلیم کم اور آبادی زیاد ہ ہے، جغرافیائی طور پر بھارت کا ڈفر زون شمالی بھارت اور شمال مشرقی حصہ ہے جو ہندو ہاٹ لائن کے طورپر جانا جاتا ہے اور جہاں بی جے پی کی اکثریت کے ساتھ بھارت کے نیشنل میڈیا کی بھی اکثریت پائی جاتی ہے۔

اوے شکلا نے کہا کہ اگر وہ ڈفر زون کے خدو خال بنائیں تو اس میں ہندوتوا کا مذہبی رنگ شامل ہے جو عدم برداشت پر مبنی ہے، یہ دوسرے مذہب اور دوسری زبان کو برداشت نہیں کرتے اور تمام مسلمانوں کو دہشت گردوں سے جوڑ دیتے ہیں، جن میں بھارتی فوج کی کرنل صوفیہ قریشی اور یونیورسٹی پروفیسر علی خان محمود آباد کی مثال نمایاں ہے، یہ ڈفر زون بتائی گئی ہر بات پر اندھا اعتقاد کرتا ہے۔