Live Updates

۵ پاکستان افریقی ممالک کے ساتھ تجارت، تعلیم، ثقافتی تبادلے اور مشترکہ ترقی کے منصوبوں میں وسعت کا خواہاں ہے

جتنا زیادہ ہم ایک دوسرے سے جڑیں گے، اتنا ہی زیادہ ہم مضبوط ہوں گے‘گورنرخیبرپختونخوا کا تقریب سے خطاب

اتوار 25 مئی 2025 18:35

kاسلام آباد (اُردو پوائنٹ اخبارتازہ ترین - آن لائن۔ 25 مئی2025ء)گورنر خیبر پختونخوا فیصل کریم کنڈی نے افریقہ کے ساتھ پاکستان کی دوستی کو ''دیرپا اور خلوص پر مبنی'' قرار دیتے ہوئے کہا ہے کہ پاکستان افریقی ممالک کے ساتھ تجارت، تعلیم، ثقافتی تبادلے اور مشترکہ ترقی کے منصوبوں میں وسعت کا خواہاں ہے۔ جتنا زیادہ ہم ایک دوسرے سے جڑیں گے، اتنا ہی زیادہ ہم مضبوط ہوں گے۔

ان خیالات کا اظہار انہوں نے اسلام آباد میں افریقہ ڈے کے موقع پر منعقدہ ایک پروقار تقریب سے بحیثیت مہمان خصوصی خطاب کرتے ہوئے کیا. تقریب میں اقوامِ متحدہ کے ریزیڈنٹ کوآرڈینیٹر محمد یحییٰ، افریقی ممالک کے سفیروں، ہائی کمشنرز، اراکین پارلیمینٹ اور دیگر ممالک کے سفرا اور دیگر مہمانوں نے بڑی تعداد میں شرکت کی۔

(جاری ہے)

گورنر خیبر پختونخوا نے افریقی عوام و افریقی ممالک کو یومِ افریقہ پر دلی مبارکباد دی اور کہا کہ اس سال کا موضوع ''ہماری تاریخ پر نظر ثانی، ہمارے مستقبل کی تشکیل'' نہ صرف افریقہ بلکہ پاکستان کے لیے بھی گہری اہمیت رکھتا ہے۔

انہوں نے کہا کہ یہ موقع ہمیں ماضی کی جدوجہد سے سبق سیکھ کر ایک بہتر اور مساوات پر مبنی مستقبل کی تعمیر کا پیغام دیتا ہے۔فیصل کریم کنڈی نے افریقی اقوام کی ثقافتی ورثے، اتحاد، اور خود انحصاری کی کاوشوں کو سراہتے ہوئے کہا کہ پاکستان، خاص طور پر خیبر پختونخوا، افریقہ کے ساتھ مشترکہ اقدار رکھتا ہے جن میں خودمختاری، ثقافتی تنوع، اور عوامی ترقی شامل ہیں۔ گورنر نے کہا کہ پاکستان افریقی ممالک کے ساتھ اپنے تعلقات کو انتہائی اہمیت دیتا ہے اور مختلف شعبوں میں تعاون کو فروغ دینے کا خواہاں ہے۔