حب کو پرامن شہر بنانا ہماری اولین ترجیح ہے،شہر کا امن خراب کرنے کی کسی کو اجازت نہیں دی جائے گی، سید فاضل شاہ بخاری

پیر 26 مئی 2025 11:10

کوئٹہ (اُردو پوائنٹ اخبارتازہ ترین - اے پی پی۔ 26 مئی2025ء) ایس ایس پی سید فاضل شاہ بخاری نے کہا ہے کہ حب کو پرامن شہر بنانا ہماری اولین ترجیح ہے، جرائم پیشہ عناصر کے خلاف زیرو ٹالرنس پالیسی پر عمل کیا جا رہا ہے۔ شہر کا امن خراب کرنے کی کسی کو اجازت نہیں دی جائے گی۔ منشیات فروشی چوری، ڈکیتی اور قانون شکنی میں ملوث افراد کے خلاف کارروائیاں بلا امتیاز جاری رہیں گی حب پولیس شہریوں کے جان و مال کے تحفظ کو ہر صورت یقینی بنائے گی اور قانون کی عملداری کو ہر حال میں برقرار رکھا جائے گا ۔

ان خیالات کا اظہار انہوں نے میڈیا سے گفتگو کرتے یوئے کیا ایس ایس پی نے کہا کہ ماہ رمضان کے دوران دکانوں میں ڈکیتیوں میں ملوث گروہ کے دو اہم کارندے گل بیگ اور ولی محمد بھی گرفتار کیے گئے، جنہوں نے متعدد وارداتوں کا انکشاف کیا۔

(جاری ہے)

پولیس نے دیگر ساتھیوں کی گرفتاری کے لیے گھیرا تنگ کر لیا ہے ایس ایس پی نے کہا کہ عوامی شکایات پر ہم نے چھاپ مار پولیس پارٹی تشکیل دی اور ڈی ایس پی امام یعقوب بلوچ کی نگرانی میں ایس ایچ او حب سٹی عبدالقادر شیخ کی قیادت میں منشیات فروشوں، اشتہاری مجرمان اور جرائم پیشہ عناصر کے خلاف کریک ڈاؤن جاری ہے ۔

پولیس نے منشیات فروش ولی محمد کو گرفتار کر کے اس کے قبضے سے 1015 گرام چرس، جبکہ دوسرے ملزم گل بیگ سے 600 گرام آئس (شیشہ) برآمد کی۔ دونوں کے خلاف علیحدہ مقدمات درج کیے گئے۔ایک اور کارروائی میں 3 ملزمان فیاض دل شاہ، مراد اور زیر داد گل محمد کو گرفتار کر کے ان کے قبضے سے کراچی کے اورنگی ٹاؤن سے چوری شدہ موٹر سائیکل برآمد کر لی گئی۔ ایس ایس پی نے بتایا کہ رند مارکیٹ سے موٹر سائیکل چوری کی کوشش میں عبد المنان رنگے ہاتھوں گرفتار ہوا جبکہ یوسف گوٹھ کراچی کے رہائشی عبدالباسط سے ندی کے قریب گن پوائنٹ پر موٹر سائیکل چھیننے والے ملزمان کی فائرنگ سے پولیس کانسٹیبل شدید زخمی ہوا۔

پولیس نے جوابی کارروائی میں سجاد عرف ٹریکٹر کو گرفتار کر کے اسلحہ برآمد قبضہ میں لیا ،مقدمہ درج کیا اور حب کے عوامی حلقوں نے جرائم ہیشہ عناصر کےخلاف کاروائیوں پر اظہار اطمینان کرتے یوئے کہا کےکہ ایس ایس پی سید فاضل شاہ بخاری ایک قابل اور نڈر پولیس افیسر ہیں وہ بلوچستان کے مختلف اضلاع میں اپنی ایمانداری سے ڈیوٹی سرانجام دی ہے ان کی تعیناتی سے ضلع حب میں امن وامان کی صورتحال میں بہتری آئی ہے۔