ہم نے خوش رہنے کی فیکٹری کھولی، ہماری پراڈکٹ ماہر فنکار ہیں، محمد احمد شاہ

آج تمام اکیڈمیز پھل پھول رہی ہیں، ہمارا آرٹ اسکول پاکستان کا پہلا آرٹ سکول تھا، 1964 کے بعد اس آرٹ اسکول کو دوبارہ سے کھولا

پیر 26 مئی 2025 12:06

کراچی (اُردو پوائنٹ اخبارتازہ ترین - این این آئی۔ 26 مئی2025ء)آرٹس کونسل آف پاکستان کراچی کے زیرِ اہتمام 3 روزہ آرٹس المنائی فیسٹیول 2025 فن کی تمام جہتوں کے رنگ بکھیرتے ہوئے اختتام پزیر ہو گیا۔اس موقع پر صدر آرٹس کونسل محمد احمد شاہ نے کہا کہ 3 دن کے فیسٹیول میں نوجوان نسل نے بڑھ چڑھ کر حصہ لیا، ان کا جوش و جذبہ قابلِ دید تھا، بہت خوشی ہو رہی ہے کہ آرٹس کونسل کی اکیڈمیز کے یہ فنکار اپنی اپنی فیلڈ میں ماہر ہو چکے ہیں۔

(جاری ہے)

محمد احمد شاہ نے کہا کہ کامیاب فیسٹیول کے انعقاد پر آرٹس کو نسل کی پوری ٹیم کو مبارک باد دیتا ہوں۔انہوں نے کہا کہ ہم نے خوش رہنے کی فیکٹری کھولی ہوئی ہے، اس فیکٹری میں ہماری پراڈکٹ ماہر فنکار ہیں۔آرٹس کونسل کے صدر نے کہا کہ جب میں نے آرٹس کونسل کی باگ دوڑ سنبھالی یہاں کچھ نہیں تھا، ایک ٹیچر سے ہم نے تھیٹر اکیڈمی شروع کی پھر میوزک اور ڈانس اکیڈمی بنائی۔ان کا کہنا تھا کہ آج تمام اکیڈمیز پھل پھول رہی ہیں، ہمارا آرٹ اسکول پاکستان کا پہلا آرٹ سکول تھا، 1964 کے بعد اس آرٹ اسکول کو دوبارہ سے کھولا۔