بھارت میں مسلمان ہونا جرم بن گیا

علی گڑھ میں ہندو انتہا پسندوں کا گائے کے گوشت کی منتقلی کا الزام ،چا ر مسلمانوں پر وحشیانہ تشدد

منگل 27 مئی 2025 21:46

اترپردیش (اُردو پوائنٹ اخبارتازہ ترین - آن لائن۔ 27 مئی2025ء) بھارت میں مذہبی اقلیتوں، بالخصوص مسلمانوں کے خلاف تشدد کا سلسلہ رکنے کا نام نہیں لے رہا۔ حالیہ واقعہ علی گڑھ میں پیش آیا جہاں خود کو گاؤ رکھشک کہنے والے ہندو انتہا پسندوں نے گوشت کی منتقلی کے الزام میں چار مسلمانوں کو وحشیانہ تشدد کا نشانہ بنایا۔ذرائع کے مطابق متاثرین معمول کے مطابق بھینس کا گوشت لے جا رہے تھے جو بھارتی قانون کے مطابق ممنوع نہیں، تاہم شدت پسندوں نے انہیں راستے میں روک کر زبردستی گاڑی سے باہر نکالا اور اینٹوں، ڈنڈوں اور لوہے کی سریوں سے بری طرح مارا پیٹا۔

تشدد کے بعد حملہ آوروں نے نہ صرف متاثرین کی گاڑی کو آگ لگا دی بلکہ ان کے موبائل فون اور نقدی بھی لوٹ لی۔ چاروں متاثرین میں سے تین کی حالت نازک ہے اور انہیں فوری طور پر اسپتال منتقل کیا گیا۔

(جاری ہے)

واقعے کی ویڈیوز سوشل میڈیا پر وائرل ہو چکی ہیں جن میں واضح طور پر دیکھا جا سکتا ہے کہ پولیس موقع پر موجود ہونے کے باوجود مکمل خاموشی اختیار کیے رہی اور کسی قسم کی مداخلت نہ کی۔

یہ واقعہ ایک بار پھر بھارت میں اقلیتوں کے غیر محفوظ ہونے کی سنگین حقیقت کو آشکار کرتا ہے۔ تجزیہ نگاروں کے مطابق یہ حملہ مودی سرکار اور بھارتیہ جنتا پارٹی کی انتہا پسند ہندووتا سوچ کی واضح عکاسی ہے، جو مذہبی منافرت کو فروغ دے رہی ہے۔بین الاقوامی ادارے اور انسانی حقوق کی تنظیمیں مسلسل بھارت میں اقلیتوں کی حالتِ زار پر تشویش کا اظہار کر رہی ہیں، مگر زمینی حقائق کے مطابق وہاں مذہبی اقلیتوں کا تحفظ ایک خواب بن چکا ہے۔