گنڈا پور شہید بھٹو کے خلاف زبان درازی سے گریز کریں، شرجیل میمن

,پیپلز پارٹی کے کارکنان کے جذبات سے کھلواڑ نہ کریں تو اچھا ہے، بھٹو کا نظریہ اور قربانی آج بھی زندہ ہے،صوبائی وزیر کا ردعمل

منگل 27 مئی 2025 21:15

sکراچی(اُردو پوائنٹ اخبارتازہ ترین - آن لائن۔ 27 مئی2025ء)علی امین گنڈاپورکے بیان پر سندھ کے سینئر وزیر شرجیل انعام میمن کا ردعمل سامنے آ گیا، انھوں نے کہا کہ علی امین گنڈا پور قائد عوام شہید بھٹو کے خلاف زبان درازی سے گریز کریں، پیپلز پارٹی کے کارکنان کے جذبات سے کھلواڑ نہ کریں تو اچھا ہے، بھٹو کا نظریہ اور قربانی آج بھی زندہ ہے۔وزیراعلٰی خیبر پختون خوا علی امین گنڈا پور کے بیان پر سندھ کے سینئر صوبائی وزیر شرجیل انعام میمن نے اپنے ردِ عمل میں کہا ہے کہ پی ٹی آئی کا بیانیہ محض چیخ و پکار، جھوٹ اور یوٹرن سے بھرا ہوا ہے، ریڈ زون کی ایس او پیز کی آڑ میں کارکنان پر شیلنگ غیر جمہوری عمل ہے، پرامن مظاہرین پر شیلنگ کسی ایس او پی نہیں، آمریت پسند ذہنیت کا ثبوت ہے۔

شرجیل میمن نے کہا کہ پیپلز پارٹی کا ریڈ زون میں جانا بھی ایک سیاسی اظہار تھا، پی ٹی آئی کی ’’جمہوریت پسندی‘‘ صرف اپنے مفاد تک محدود ہے، جنہیں کل اسلام آباد میں کنٹینر توڑنے کی مکمل آزادی حاصل تھی، آج وہی ریڈ زون کی دیواروں کے محافظ بنے بیٹھے ہیں، شہید بھٹو کو تاریخ نے نہیں آمریت نے پھانسی چڑھایا۔

(جاری ہے)

سینئر صوبائی وزیر سندھ نے کہا کہ وہی آمریت جس کے کاندھوں پر بیٹھ کر پی ٹی آئی نے حکومت بنائی تھی، عدالتیں خود فیصلے دے چکی ہیں، جیل میں بے گناہی کا بیانیہ سیاسی مظلومیت کی دکان چمکانے کی کوشش ہے، پی ٹی آئی والے جس سسٹم کی کوکھ سے وہ نکلے آج اسی پر الزام لگا رہے ہیں۔

شرجیل میمن کا کہنا ہے کہ پی ٹی آئی کا کوئی بیانیہ نہیں، اس کی پوری سیاست ناکام تحریک ہے، ناکام قیادت، اور ناکام سیاسی اخلاقیات کا مظہر ہے۔