ڈپٹی چیئرمین سینیٹ سیدال خان ناصر کا اعلیٰ سطحی پارلیمانی وفد کے ہمراہ چین کے شہر شیان میں واقع ’’ٹیراکوٹا آرمی میوزیم‘‘ کا دورہ

بدھ 28 مئی 2025 00:30

شیان، چین (اُردو پوائنٹ اخبارتازہ ترین - اے پی پی۔ 28 مئی2025ء) ڈپٹی چیئرمین سینیٹ سیدال خان ناصر نے اعلیٰ سطحی پارلیمانی وفد کے ہمراہ چین کے شہر شیان میں واقع دنیا کے مشہور زمانہ "ٹیراکوٹا آرمی میوزیم" کا دورہ کیا۔ منگل کو سینیٹ سیکرٹریٹ سے جاری اعلامیہ کے مطابق چینی حکام اور میوزیم کے نمائندوں نے پاکستانی وفد کا پرتپاک خیرمقدم کیا اور انہیں میوزیم کا تفصیلی دورہ کرایا۔

اس موقع پر وفد کو چین کے پہلے شہنشاہ، قن شی ہوانگ کے دور حکومت اور ان کے مقبرے کی حفاظت کے لیے تیار کی گئی تاریخی ٹیراکوٹا فوج کے بارے میں آگاہ کیا گیا۔ چینی ماہرین نے وفد کو بتایا کہ یہ فوج تیسری صدی قبل مسیح کی ہے اور یہ چین کے شاندار ماضی اور فن تعمیر کا ایک قابلِ فخر ورثہ ہے۔ڈپٹی چیئرمین سینیٹ سیدال خان ناصر نے اس موقع پر اپنے خیالات کا اظہار کرتے ہوئے میوزیم میں محفوظ تاریخی ورثے کی تعریف کی اور کہا کہ ایسی تاریخی یادگاریں نہ صرف کسی قوم کی عظمت کی علامت ہوتی ہیں بلکہ دنیا بھر کے اقوام کے درمیان ثقافتی سفارتکاری کو فروغ دینے کا ذریعہ بھی بنتی ہیں۔

(جاری ہے)

انہوں نے کہا کہ ٹیراکوٹا آرمی چین کی قدیم عظمت کی ایک زندہ مثال ہے۔ یہ ہمیں اس بات کی یاد دہانی کرواتی ہے کہ تاریخی ورثے کا تحفظ اور بین الاقوامی سطح پر عوامی روابط کو فروغ دینا ہماری مشترکہ ذمہ داری ہے۔اس دورے کے دوران دونوں ممالک کے وفود کے درمیان باہمی دلچسپی کے مختلف امور پر بھی تبادلہ خیال ہوا، خصوصاً ثقافتی تبادلوں، سیاحت کے فروغ اور تعلیمی تعاون کو مزید وسعت دینے پر زور دیا گیا۔ چینی حکام نے پاکستانی وفد کو بتایا کہ وہ پاکستان کے ساتھ تعلقات کو قدر کی نگاہ سے دیکھتے ہیں اور مستقبل میں مزید قریبی تعاون کے خواہاں ہیں۔