مقبوضہ جموں وکشمیر،پاکستانی پرچم، فیلڈ مارشل سید عاصم منیر کی تصاویر والے پوسٹر چسپاں

بدھ 28 مئی 2025 16:15

سری نگر(اُردو پوائنٹ اخبارتازہ ترین - این این آئی۔ 28 مئی2025ء)بھارت کے غیر قانونی زیر قبضہ جموںوکشمیر میں ایک مرتبہ پھر پوسٹر چسپاں کیے گئے ہیں جن میں پاکستانی پرچم، آرمی چیف فیلڈ مارشل سید عاصم منیر اور رافیل سمیت دیگر بھارتی جنگی طیاروں کو مار گرانے والے پاکستان کے J-10C لڑاکا طیارے کی تصاویر موجود ہیں۔کشمیر میڈیا سروس کے مطابق آزادی پسندتنظیموں کی طرف سے پوسٹر ’’آپریشن بنیان موصوس‘‘ کے تناظر میں سری نگر اور مقبوضہ علاقے کے دیگر علاقوں میں دیواروں ، کھمبوں اور ستونوںوغیرہ پر چسپاں کیے گئے ہیں۔

پوسٹروں کے ذریعے حق خود ارادیت کی منصفانہ جدوجہد میں کشمیریوں کی بھر پور سیاسی ،سفارتی اور اخلاقی حمایت پر حکومت پاکستان اور افواج کا شکریہ ادا کیا گیا۔

(جاری ہے)

پوسٹروں میں لکھا ہے ’’پاکستان زندہ باد،بھارتی فوجی جارحیت کیخلاف پاکستان کے منہ توڑ جواب نے کشمیریوں کے دل جیت لیے ہیں، پیشہ ورانہ مہارتوں سے لیس پاکستان کی مسلح افواج تعریف کی مستحق ہیں، پاکستان نے بھارت کی فوجی صلاحیت کا پول کھول دیا ہے۔

پوسٹروں میں مزید لکھا ہے کہ ’’کشمیر ی غیر قانونی بھارتی تسلط سے آزادی تک ہرگز چین سے نہیں بیٹھیں گے ، پاکستان نے بھارت کے توسیع پسندانہ عزائم ناکام بنا دیے، خطے کے امن پسند ملکوں کو پاکستان کا مشکور ہونا چاہیے جس نے بھارت کے ناپاک منصوبوں پر پانی پھیر دیا ہے۔پوسٹرسماجی رابطوں کی سائٹوں پر بھی اپ لوڈ کیے گئے ہیں۔