اسلام آباد ،ڈاکوؤں کی فائرنگ سے پولیس افسر شہید، ساتھی اہلکار زخمی

بدھ 28 مئی 2025 17:22

اسلام آباد (اُردو پوائنٹ اخبارتازہ ترین - این این آئی۔ 28 مئی2025ء)وفاقی دارالحکومت اسلام آباد میں ڈاکوؤں کی فائرنگ سے اسسٹنٹ سب انسپکٹر (اے ایس آئی) سدھیر احمد عباسی شہید، ساتھی کانسٹیبل جعفر جہانگیر زخمی ہوگیا، پولیس کی جانب سے ملزمان کی گرفتاری کے لیے ضلع بھر میں سرچ آپریشن شروع کر دیا گیا ۔میڈیا رپورٹ کے مطابق یہ واقعہ فیض آباد میٹرو اسٹیشن کے قریب اس وقت پیش آیا، جب سی آئی اے اسلام آباد پولیس کی ٹیم ملزمان کی گرفتاری کے لیے ان کا پیچھا کر رہی تھی۔

(جاری ہے)

ترجمان اسلام آباد پولیس کے مطابق ملزمان نے پولیس ٹیم پر اندھا دھند فائرنگ کی، پولیس حکام نے یقین دہانی کرائی ہے کہ جلد ملزمان کو گرفتار کر کے قانون کے کٹہرے میں لایا جائے گا۔علاوہ ازیں اسلام آباد میں ڈاکوؤں کی فائرنگ سے شہید ہونے والے اے ایس آئی سدھیر احمد عباسی کی نماز جنازہ ادا کردی گئی۔نماز جنازہ پولیس لائنز ہیڈکوارٹرز میں ادا کی گئی جس کے بعد شہید کو سلامی دی گئی، شہید اے ایس آئی سدھیر عباسی کی تدفین ان کے آبائی گاؤں ٹھلہ ایبٹ آباد میں کی گئی ۔نماز جنازہ میں اعلیٰ پولیس افسران، ڈپٹی کمشنر (ڈی سی) اسلام آباد اور ضلعی انتظامیہ کے افسران و جوانوں نے شرکت کی۔