Live Updates

نیپالی کوہ پیما نے 31 ویں بار ماؤنٹ ایورسٹ سر کرکے عالمی ریکارڈ توڑ دیا

بدھ 28 مئی 2025 20:41

اسلام آبا د(اُردو پوائنٹ اخبارتازہ ترین - آن لائن۔ 28 مئی2025ء)نیپالی کوہ پیما نے 31 بار دنیا کی بلند ترین چوٹی ماؤنٹ ایورسٹ کو سر کرکے اپنا ہی قائم کردہ ریکارڈ توڑ دیا۔نیپالی کوہ پیما کامی ریتا شیرپا نے یہ کارنامہ انجام دیتے ہوئے اپنا ہی ریکارڈ توڑ دیا ہے، جو انہوں نے 2024 میں 29 ویں اور 30ویں بار ماؤنٹ ایورسٹ سر کرکے بنایا تھا۔55 سالہ نیپالی شیرپا گائیڈ کامی ریتا کو ایورسٹ مین کے نام سے بھی پہچانا جاتا ہے۔

انہوں نے پہلی بار 1994 میں ماؤنٹ ایورسٹ پر چڑھائی کی تھی اور تب سے یہ سلسلہ چلا آ رہا ہے۔سیون سمٹ ٹریکس کے مطابق کامی ریتا نے 22 رکنی بھارتی فوجی ٹیم کی رہنمائی کرتے ہوئے دنیا کی سب سے بلند 8 ہزار 849 میٹر (29 ہزار 32 فٹ) چوٹی روایتی جنوب مشرقی کنارے کے راستے سے سر کی، اس گروپ میں 27 دیگر شیرپا بھی شامل تھے۔

(جاری ہے)

کامی ریتا نے ناصرف خود چوٹی سر کی بلکہ انہوں نے ٹیم کے آخری رکن تک کی قیادت اور رہنمائی کی۔

مہم کے منتظمین، سیون سمٹ ٹریکس نے 31ویں بار دنیا کی بلند ترین چوٹی سر کرنے پر انہیں مبارک باد بھی پیش کی۔اس سے قبل پاکستان سے تعلق رکھنے والی کوہ پیما نائلہ کیانی نے نیپال میں واقع دنیا کی تیسری بلند ترین چوٹی کینچن جنگا کو سر کیا تھا، جس کی بلندی 8,650 میٹر ہے۔پاکستانی کوہ پیما نائلہ کیانی یہ کارنامہ انجام دینے والی پہلی پاکستانی خاتون کوہ پیما بن گئیں،جنہوں نے آٹھ ہزار میٹر سے بلند بارہ چوٹیاں سر کرلی، وہ ماؤنٹ ایورسٹ، کے ٹو، ناگا پربت سمیت دیگر بلند ترین چوٹیاں بھی سر کرچکی ہیں۔نائلہ کی یہ کامیابی نہ صرف پاکستانی خواتین کے لیے باعثِ فخر ہے بلکہ ملک کے کوہ پیمائی کے شعبے میں ایک نئی تاریخ بھی رقم کر رہی ہے۔