پاکستان اور آذربائیجان کے مابین سیاحت،آئل ریفائنریز اور دیگر شعبوں میں تعاون کے وسیع مواقع موجود ہیں، چوہدری شافع حسین

لاہور (اُردو پوائنٹ اخبارتازہ ترین - اے پی پی۔ 28 مئی2025ء) صوبائی وزیر صنعت و تجارت چوہدری شافع حسین نے آذربائیجان ٹریڈ ہاؤس میں یوم تکبیر اور آذربائیجان کے یوم آزادی کے حوالے سے منعقدہ تقریب میں بطور مہمان خصوصی شرکت کی۔ صوبائی وزیر نے پرچم کشائی کی اور آذربائیجان کے یوم آزادی کے حوالے سے کیک کاٹا۔ صوبائی وزیر نے آذربائیجان کے قومی دن پر آذربائیجان کی حکومت اور عوام کو مبارکباد دی۔

صوبائی وزیر چوہدری شافع حسین نے اس موقع پر میڈیا سے گفتگو کرتے ہوئے کہا کہ پاکستان کی مسلح افواج نے بھارت کی جارحیت کا منہ توڑ جواب دیا۔ پاکستان کی مسلح افواج کی بہادری اور دلیری نے عوام کا جزبہ پھر سے بیدار کردیا۔انہوں نے کہا کہ 28 مئی پاکستان کی تاریخ کا اہم دن ہے اور آج کے دن پاکستان پہلی اسلامی ایٹمی قوت بنا۔

(جاری ہے)

ملک بھر میں یوم تکبیر کے حوالے سے تقریبات کا انعقاد کیا گیا گیا ہے جس میں لوگوں نے بھر پور شرکت کی۔

صوبائی وزیر نے کہا کہ پاکستان اور آذربائیجان کے مابین گہرے دوستانہ اور معاشی تعلقات قائم ہیں۔ آذربائیجان کی جانب سے پاکستان میں 2ارب ڈالر کی سرمایہ کاری کے حوالے سے حکومت پاکستان کے ساتھ معاہدہ ہوا ہے۔ اس سلسلے میں دونوں ممالک کے وفود جلد دورے کریں گے۔ پاکستان اور آذربائیجان کے مابین سیاحت،آئل ریفائنریز اور دیگر شعبوں میں تعاون کے وسیع مواقع موجود ہیں۔

انہوں نے کہا کہ وزیراعلیٰ مریم نواز کی قیادت میں پنجاب حکومت سیاحتی مقامات کو ترقی دینے کیلئے جامع پروگرام پر عمل پیرا ہے ، پنجاب اور آذربائیجان کے مابین سیاحت اور دیگر شعبوں میں تعاون بڑھایا جائے گا۔ صوبائی وزیر نے کہا کہ آذربائیجان کی حکومت نے پاکستان سے درآمدی چاول پر ڈیوٹی کم کی ہے۔آنیوالے دنوں میں دونوں ممالک کے معاشی تعلقات میں مزید بہتری آئے گی۔

چوہدری شافع حسین نے کہا کہ حالیہ پاکستان اور بھارت کشیدگی کے دوران آذربائیجان نے پاکستان کا بھرپور ساتھ دیا۔ہر گزرتے لمحے دونوں ممالک کی دوستی اور معاشی تعاون بڑھ رہا ہے۔ صدر آذربائیجان ٹریڈ ہاؤس عدیل شجاع بٹ، سی ای او عرفان شجاع بٹ،سرپرست عدنان شجاع بٹ،حافظ عثمان،افضل خان،میاں امتیاز اور دیگر بھی اس موقع پر موجود تھے۔