Live Updates

مخصوص نشستوں کا کیس پی ٹی آئی کا نہیں ملک کی جمہوریت کا مقدمہ ہے، سلمان اکرم راجہ

امید ہے عدالت ہمیں انصاف دیگی، ہماری جیتی ہوئی سیٹوں کے مطابق مخصوص نشستیں ہمیں ملیں گی،دوسری پارٹیوں کو مال غنیمت کے طور پر مخصوص نشستیں نہیں دی جاسکتیں، بیرسٹر گوہر ودیگر کی پریس کانفرنس

فیصل علوی جمعرات 29 مئی 2025 16:16

مخصوص نشستوں کا کیس پی ٹی آئی کا نہیں ملک کی جمہوریت کا مقدمہ ہے، سلمان ..

اسلام آباد(اردوپوائنٹ اخبار تازہ ترین۔29 مئی 2025)پاکستان تحریک انصاف کے رہنماﺅں کا کہنا ہے کہ مخصوص نشستوں کا کیس پی ٹی آئی کا نہیں ملک کی جمہوریت کا مقدمہ ہے، آئینی فرض تھا کہ صاف و شفاف الیکشن ہوں،امید ہے عدالت ہمیں انصاف دیگی،12 جون 2024 کا اکثریتی فیصلہ عظیم الشان فیصلہ ہے، پی ٹی آئی کے سیکرٹری جنرل سلمان اکرم راجہ نے بیرسٹرگوہر و دیگر کے ہمراہ پریس کانفرنس کرتے ہوئے کہاکہ ہم پاکستان کے جمہوریت کی جنگ لڑ رہے ہیں۔

امید ہے سپریم کورٹ 26ویں آئین ترمیم کے تحت انصاف دے گی۔8 جج صاحبان نے کہا کہ جو غلطیاں الیکشن کمیشن نے کی اس کا خمیازہ عوام کو بھگتنے نہیں دیں گے۔ سیٹیں پی ٹی آئی نے جیتی ہیں لہٰذا مخصوص نشستیں بھی پی ٹی آئی کو ملنی چاہیے۔ انہوں نے کہا کہ افراتفری کے عالم کا بڑا سبب الیکشن کمیشن آف پاکستان تھا جس نے اپنا آئینی فرض ادا نہیں کیا اس کے فیصلوں نے عوام کے راستوں میں رکاوٹ ڈالی۔

(جاری ہے)

رہنماءپی ٹی آئی سلمان اکرم راجہ کامزید یہ بھی کہنا تھا کہ 8 فروری کو پاکستان کی جمہوریت کو نقصان پہنچایا گیا۔ جج صاحب نے کہا کہ الیکشن کمیشن اپنی ذمہ داری نبھانے میں ناکام رہا۔یہ مقدمہ پاکستانی عوام کا ہے۔ اس موقع پر میڈیا سے گفتگو کرتے ہوئے پاکستان تحریک انصاف کے چیئرمین بیرسٹر گوہرنے کہا کہ ہماری جیتی ہوئی سیٹوں کے مطابق مخصوص نشستیں ہمیں ملیں گی۔

ہمیں سپریم کورٹ سے توقع ہے کہ انصاف ملے گا، امید ہیں مخصوص نشستیں ہمیں ملیں گی۔دوسری پارٹیوں کو مال غنیمت کے طور پر مخصوص نشستیں نہیں دی جاسکتیں۔ ہم چیف جسٹس ہائیکورٹ سے ملے تھے امید ہے 5 تاریخ کو کیس لگ جائے گا۔چیف جسٹس خود ملے تھے، رہائی کیس سننے کے بعد ہوگی، امید ہے بانی پی ٹی آئی کے کیس کی تاریخ لگ جائے گی۔مخصوص نشستیں اس جماعت کا حق ہے جس کو عوام نے ووٹ دیا۔

ان کا کہنا تھا کہ جہاں تک کچھ لو اور کچھ دو کی بات ہے تو لوگوں نے مس گائیڈ کیا ہے۔بانی پی ٹی آئی عمران خان بارہا کہہ چکے ہیں کہ کبھی بھی ڈیل کے تحت باہر نہیں آوں گا۔ بانی پی ٹی آئی بے گناہ ہیں ہر قیمت میں رہائی ہونی چاہیے۔ بانی پی ٹی آئی کے خلاف بنے تمام کیس سیاسی اور بوگس ہیں پہلے بانی پر 300 کیس بنائے گئے اور انہیں 45 سال کی سزائیں دی گئیں۔ بانی پی ٹی آئی عوام کے دلوں میں ہیں۔