Live Updates

پاکستان اقوامِ متحدہ کے امن مشن میں سب سے زیادہ افواج فراہم کرنے والے ممالک میں شامل ہے، ڈاکٹر فردوس عاشق اعوان

جمعرات 29 مئی 2025 22:53

سیالکوٹ (اُردو پوائنٹ اخبارتازہ ترین - اے پی پی۔ 29 مئی2025ء) سابق وفاقی وزیر ڈاکٹر فردوس عاشق اعوان نے کہا ہے کہ پاکستان اقوامِ متحدہ کے امن مشن میں سب سے زیادہ افواج فراہم کرنے والے ممالک میں شامل ہے، جو ہمارے ملک کے پرامن اور ذمہ دارانہ کردار کا مظہر ہے،پاکستانی فوج کے جوانوں نے دنیا کے مختلف خطوں میں امن کے علمبردار بن کر نہ صرف امن قائم کیا بلکہ انسانیت کی بے لوث خدمت بھی کی۔

ان خیالات کا اظہار انہوں نے اقوام متحدہ کے امن مشن کے عالمی دن کے موقع منعقدہ تقریب سے خطاب کرتے ہوئے کیا ۔ اس موقع پر انہوں نے اپنے خطاب میں مزید کہا کہ سیالکوٹ کے عوام کو فخر ہے کہ اس دھرتی نے ایسے سپوت پیدا کیے ہیں جو نہ صرف ملکی دفاع بلکہ عالمی امن کے لیے بھی اپنی خدمات پیش کر رہے ہیں۔

(جاری ہے)

تقریب کے دوران امن کے شہداء کے لیے دعائے مغفرت کی گئی اور ان کی خدمات کو سراہا گیا۔

اس موقع پر خصوصی ڈاکومنٹری بھی دکھائی گئی جس میں پاکستانی امن مشنز کی بین الاقوامی سطح پر خدمات کو اجاگر کیا گیا۔سابق وفاقی وزیر ڈاکٹر فردوس عاشق اعوان نے اقوامِ متحدہ سے مطالبہ کیا کہ وہ عالمی سطح پر ان سپاہیوں کے کردار کو مزید اجاگر کرے اور امن کے قیام کے لیے مالی و تکنیکی معاونت بہتر بنائے ۔تقریب کےاختتام پر انہوں نے کہا کہ امن کا پیغام دینا صرف حکومتوں کی ذمہ داری نہیں بلکہ ہر فرد کا فریضہ ہے،ہمیں بحیثیت قوم اپنے ان سپاہیوں کو خراجِ تحسین پیش کرتے ہوئے اپنی صفوں میں اتحاد، ہم آہنگی اور برداشت کو فروغ دینا ہوگا۔