Live Updates

امریکہ سے آئے وفد کو کوئی کامیابی نہیں ملی، عمران خان سے ملاقات میں ناکام

پاکستانی نژاد امریکی ڈاکٹرز اور تاجروں کا وفد اسلام آباد میں 4 روز گزارنے کے بعد بغیرکسی بریک تھرو کے لاہور پہنچ گیا،وفدکو بانی پی ٹی آئی کو درپیش قانونی اور سیاسی مسائل میں ریلیف دلانے میں فی الحال کوئی کامیابی نہیں ملی،سینئر صحافی انصار عباسی کا دعویٰ

فیصل علوی ہفتہ 31 مئی 2025 15:30

امریکہ سے آئے وفد کو کوئی کامیابی نہیں ملی، عمران خان سے ملاقات میں ..

اسلام آباد(اردوپوائنٹ اخبار تازہ ترین۔31 مئی 2025)سینئر صحافی انصارعباسی نے دعویٰ کیا ہے کہ بانی پی ٹی آئی عمران خان اور اہم عہدیداروں سے ملاقات کیلئے آیا پاکستانی نژاد امریکی ڈاکٹرز اور تاجروں کا وفد اسلام آباد میں 4 روز گزارنے کے بعد بغیر ملاقات کئے اور بغیرکسی بریک تھرو کے لاہور پہنچ گیا،یہ وفد بانی پی ٹی آئی عمران خان سے ملاقات کی کوشش کر رہا ہے لیکن اسے اب تک کوئی کامیابی نہیں ملی۔

قابل بھروسہ ذرائع کا کہنا ہے کہ امریکہ سے آئے وفد کو ہفتے کے روز امریکہ واپس جانا تھا لیکن ممکن ہے وہ اب یہ وفد پاکستان میں اپنے قیام کو توسیع دے گا تاکہ اہم ملاقاتیں ہو سکیں۔ وفد چند روزقبل پاکستان پہنچا تھا اور اسے امید تھی کہ اڈیالہ جیل میں پی ٹی آئی کے بانی چیئرمین عمران خان سے ملاقات ہوگی اور خاموش سفارتکاری کا آغاز ہوگا تاکہ عمران خان کو درپیش قانونی اور سیاسی مسائل میں ریلیف مل سکے تاہم وفد کو ان کوششوں میں تاحال کوئی کامیابی نہیں ملی۔

(جاری ہے)

موجودہ سیاسی ماحول پی ٹی آئی اور اسٹیبلشمنٹ کے درمیان نہ ختم ہونے والی کشیدگی کی وجہ سے اس وفد کو عمران خان اور اسٹیبلشمنٹ کے درمیان مفاہمت کیلئے سہولت کاری میں کوئی کامیابی نہیں ملی۔وفد کا خیال ہے کہ بانی پی ٹی آئی عمران خان کو اس کی پاکستان میں موجودگی کا علم ہے اور شاید وہ ان سے ملاقات کیلئے آمادہ ہوں۔ذرائع کا کہنا ہے کہ یہ وفد پاکستان تحریک انصاف کے کچھ رہنماوں سے رابطے میں ہے جن میں وزیر اعلیٰ خیبرپختونخواہ علی امین گنڈا پور اوربانی پی ٹی آئی عمران خان کی بہن علیمہ خان شامل ہیں۔

ذرائع نے بتایا کہ پاکستان کے دورہ پر آئے ڈاکٹرز اور تاجروں کا بھی یہ خیال ہے کہ پارٹی کے سخت موقف نے تعمیری بات چیت کیلئے ماحول تنگ کر دیا ہے۔ کوئی ملاقات طے نہ ہونے اور بریک تھرو کے کسی اشارے کے بغیر وفد کا دورہ پی ٹی آئی اور اسٹیبلشمنٹ کے درمیان بڑھتی خلیج کی عکاسی کرتا ہے۔ پاکستان میں وفد کا طویل قیام مفاہمت کی مسلسل امید کی نشانی ہے لیکن تعطل تاحال برقرار ہے۔

پی ٹی آئی کے مسلسل محاذ آرائی پر مبنی موقف سے لگتا ہے کہ عسکری قیادت کو کوئی فرق نہیں پڑا جو پہلے ہی اس عزم کا اظہار کر چکی ہے کہ وہ سیاسی جماعتوں سے براہِ راست کوئی تعلق نہیں رکھے گی۔ ملٹری اسٹیبلشمنٹ پر مسلسل تنقید، جارحانہ آن لائن مہمات اور بین الاقوامی لابنگ بالخصوص امریکا اور برطانیہ میں پی ٹی آئی کے بیرون ملک چیپٹرز کے اقدامات نے حالات کو مزید پیچیدہ کر دیا ہے۔