Live Updates

یونیورسٹی آف سرگودھا اور آذربائیجان کا مختلف تعلیمی شعبوں میں تعاون بڑھانے کے لیے معاہدہ

ہفتہ 31 مئی 2025 17:20

سرگودھا (اُردو پوائنٹ اخبارتازہ ترین - اے پی پی۔ 31 مئی2025ء) یونیورسٹی آف سرگودھا اور آذربائیجان کی وزارت سائنس و تعلیم کے تحت قائم انسٹیٹیوٹ آف کنٹرول سسٹمزکے درمیان سائنس، ٹیکنالوجی، انجینئرنگ اور ریاضی کے شعبوں میں تعاون بڑھانے کے لیے باہمی تعاون کی یاداشت پر دستخط کیے گئے۔معاہدے پر دستخط یونیورسٹی آف سرگودھا کے ڈین فیکلٹی آف سوشل سائنسز پروفیسر ڈاکٹر مسعود سرور اعوان اور انسٹیٹیوٹ آف کنٹرول سسٹم کے نمائندہ ڈاکٹر توفیق بابایوف نے کیے۔

یہ تقریب پانچویں سالانہ کیریک ریسرچ کانفرنس کے موقع پر منعقد ہوئی جبکہ اس موقع پر وائس چانسلر پروفیسر ڈاکٹر قیصر عباس، کیریک کے ڈائریکٹر، سرگودھا یونیورسٹی کے ڈائریکٹر ایکسٹرنل لنکجز پروفیسر ڈاکٹر اعجاز اصغر بھٹی، ڈائریکٹر اورک پروفیسر ڈاکٹر احمد رضا بلال اور ڈائریکٹر کیو ای سی ڈاکٹر عمران غفور بھی موجود تھے۔

(جاری ہے)

معاہدے کے تحت دونوں ادارے مشترکہ تحقیق، فیکلٹی اور طلبہ کے تبادلوں، تعلیمی جدت اور خودکار نظاموں و کمپیوٹنگ جیسے شعبوں میں تعاون کو فروغ دیں گے۔

معاہدے کے مطابق، دونوں ادارے فیکلٹی اور طلبہ کے تبادلے، مشترکہ تحقیقی منصوبے، علمی تقاریب کے انعقاد، اور کتب خانوں و لیبارٹریز جیسے تعلیمی وسائل کے اشتراک کو ترجیح دیں گے۔ ہر سرگرمی علیحدہ معاہدے اور مالیاتی بندوبست کے تحت عمل میں آئے گی۔ڈاکٹر توفیق بابایوف نے اس تعاون کا خیرمقدم کرتے ہوئے کہا کہ یہ شراکت داری آذربائیجان اور پاکستان کے سائنسدانوں کے لیے عالمی سطح کے تکنیکی چیلنجز سے مشترکہ طور پر نمٹنے کے دروازے کھولے گی۔

میڈیا سے گفتگو کرتے ہوئیوائس چانسلر پروفیسر ڈاکٹر قیصر عباس نے یونیورسٹی آف سرگودھا کی بین الاقوامی تعلیمی شراکت داریوں کے عزم کو دہرایا اور پاکستان میں کیریک یونیورسٹی کے قیام کے اپنے وژن کا اظہار کیا۔انہوں نے مزید کہا کہ ہم ایک ایسے ادارے کی بنیاد رکھنا چاہتے ہیں جو نہ صرف خطے میں تعلیمی ربط کو مضبوط کرے بلکہ اختراع اور ترقی میں بھی قیادت کرے۔