مہاجرین 1990ء کشمیر کو الگ نشستیں،ہر مہاجر کو 100 کنال اراضی دی جائے، طاہر کھوکھر

مہاجرین جس حالت میں کیمپوں اور بوسیدہ بستیوں میں رہ رہے ہیں وہ کسی جیل سے کم نہیں،مرکزی صدر پاسبان وطن پاکستان

اتوار 1 جون 2025 13:05

اسلام آباد (اُردو پوائنٹ اخبارتازہ ترین - این این آئی۔ 01 جون2025ء)پاسبان وطن پاکستان کے مرکزی صدر محمد طاہر کھوکھر نے مطالبہ کیا ہے کہ مہاجرین کشمیر کے لیے آزاد کشمیر اسمبلی میں الگ نشستیں مختص کی جائیں تاکہ ان کا اپنا نمائندہ ہو جو براہ راست ان کے مسائل کو اجاگر اور حل کر سکے مہاجرین 1990ء کی دو نشستوں کی بھرپور حمایت کرتے ہیں اور ان کا یہ مطالبہ اخلاقی طور پر جائز ہے مہاجرین کشمیر آج بدترین حالات سے گزر رہے ہیں ان کی زندگی کیسی تنگی بے بسی اور محرومی کا شکار ہے یہ موجودہ حکمرانوں اور اُن سیاستدانوں کے لیے لمحہ فکریہ ہے جو ہر الیکشن میں مہاجرین کے ووٹوں سے کامیاب ہوتے ہیں لیکن ان کے مسائل پر کبھی سنجیدگی سے بات نہیں کرتے۔

انہوں نے کہا کہ کئی دہائیاں گزر جانے کے باوجود مہاجرین کی بحالی و آبادکاری کے لیے آج تک کوئی ٹھوس اور جامع پالیسی مرتب نہیں کی گئی۔

(جاری ہے)

مہاجرین جس حالت میں کیمپوں اور بوسیدہ بستیوں میں رہ رہے ہیں، وہ کسی جیل سے کم نہیں۔طاہر کھوکھر نے وفاقی اور آزادحکومت کو تجویز دی کہ ہر مہاجر خاندان کو کم از کم 100 کنال اراضی دی جائے، تاکہ وہ ان علاقوں میں آباد ہوں زراعت کریں اور درخت لگائیںاس سے نہ صرف مہاجرین کی باعزت آبادکاری ممکن ہوگی بلکہ آزاد کشمیر کے غیر آباد علاقوں کو بھی ترقی ملے گی اور ریاستی معیشت کو زراعت، پھلوں اور لکڑی سے فائدہ پہنچے گا۔

انہوں نے مہاجرین سے اپیل کی کہ وہ اُن نمائندوں اور سیاستدانوں کے دھوکے میں نہ آئیں جو ہر الیکشن میں ٹوٹے نلکے، گلی کی پختگی یا ایک بجری کے ٹرک کے بدلے مہاجرین کا ووٹ خرید لیتے ہیںمہاجرین کو اب اس مافیا سے باہر نکلنا ہوگا جو ان کے نام پر سیاست کرتا ہے مگر ان کے مسائل پر خاموش رہتا ہے اب وقت آ گیا ہے کہ مہاجرین اپنے حقوق کی آواز خود بلند کریں اور اپنی سیاسی سمت کا ازسرِنو تعین کریں اگر مہاجرین کو ان کے بنیادی حقوق اور باعزت زندگی کا حق نہ دیا گیا تو اس سے نہ صرف انسانی مسائل جنم لیں گے بلکہ یہ حکومت اور تحریک ٓآزادی کشمیرکے لیئے منفی پیغام جائے گا -